ఎన్నారైలు ఇండియాలో ఇల్లు కొనే ముందు ఏం చూడాలంటే?

అమెరికాలో నివసిస్తున్న ఓ ఎన్నారై భారత్ వచ్చినప్పుడు హైదరాబాద్ లో ఓ రెసిడెన్షియల్ ఫ్లాట్ ను కొనుగోలు చేయాలని నిర్ణయించుకున్నారు. ఆర్బీఐ నిబంధనలను తనిఖీ చేశారు. ప్రాపర్టీ వివరాలను పరిశీలించారు. అనంతరం ఇంటి రుణం కోసం దరఖాస్తు చేసుకుని, తండ్రికి పవర్ ఆఫ్ అటార్నీ ఇచ్చారు.

విదేశీ మారక ద్రవ్య నిర్వహణ చట్టం (ఫెమా) నిబంధనల ప్రకారం ఎన్నారైలు భారతదేశంలో కమర్షియల్, రెసిడెన్షియల్ ప్రాపర్టీలు చట్టబద్ధంగా కొనుగోలు చేయవచ్చు. కానీ వారసత్వంగా లేదా రిజర్వ్ బ్యాంక్ ఆఫ్ ఇండియా ద్వారా ప్రత్యేకంగా ఆమోదం తెచ్చుకుంటేనే వ్యవసాయ భూమి, తోటలు, ఫామ్‌హౌస్‌లను కొనుగోలు చేయడానికి వీలవుతుంది. ఈ నేపథ్యంలో ఎన్నారైలు ఇండియాలో ప్రాపర్టీ కొనే ముందు ఏ విషయాలు తెలుసుకోవాలో చూద్దామా?

ఆస్తి కొనుగోలుకు ఎలా నిధులు సమకూర్చాలి

ప్రాపర్టీ కొనుగోలుకు విదేశాల నుంచి నిధులు సమకూరితే, వాటిని ఎన్ఆర్ఈ (నాన్-రెసిడెంట్ ఎక్స్ టర్నల్) ఖాతాలోకి జమ చేయాలి. ప్రాపర్టీ ధర చెల్లింపు ఈ ఖాతా నుంచే చేయాలి. నిధులు ఎక్కడ నుంచి వచ్చాయో తెలియజేసేందుకు బ్యాంక్ స్టేట్ మెంట్ ఉంచుకోవడం ముఖ్యం. ఆ ప్రాపర్టీ అమ్మకం ద్వారా వచ్చే ఆదాయాన్ని వారి నివాస దేశానికి తిరిగి పంపించాలనుకుంటే ఈ డాక్యుమెంటేషన్ చాలా కీలకం. ఎన్నారైలు భారతీయ బ్యాంకులు, హౌసింగ్ ఫైనాన్స్ కంపెనీల నుంచి గృహ రుణాలకు కూడా అర్హులు. ఈ ఖాతాలను ఉపయోగించి ఆర్బీఐ మార్గదర్శకాల ప్రకారం రుణ చెల్లింపులు చేయాల్సి ఉంటుంది. ఒకవేళ కొనుగోలుకు ఆదాయం భారతదేశంలో ఇప్పటికే ఉన్న నిధుల ద్వారా సమకూరితే, చెల్లింపులను ఏదైనా దేశీయ బ్యాంకు ఖాతాను ఉపయోగించి చేయొచ్చు.

పన్ను విషయాలు

విక్రేతకు చెల్లింపు చేస్తున్నప్పుడు భారతదేశంలో పన్ను రిటర్నులను క్రమం తప్పకుండా దాఖలు చేయకపోయినా, టీడీఎస్ సరిగా తగ్గించారా లేదా అనేది ఎన్నారైలు నిర్ధారించుకోవాలి. టీడీఎస్ మినహాయించడం, అనంతరం దానిని జమ చేయడంలో విఫలమైతే ఆ పన్ను బాధ్యత కొనుగోలుదారులదే అన్న విషయం గుర్తుంచుకోవాలి. వాస్తవానికి ఎన్నారైలు ఇండియాలో ప్రాపర్టీ కొనుగోలు చేసిన తర్వాత ఇక్కడ వార్షిక ఆదాయపన్ను రిటర్నులు దాఖలు చేయడం మంచిదని నిపుణులు చెబుతున్నారు. ప్రాపర్టీ నుంచి వచ్చే ఆదాయం పన్ను విధించదగిన పరిమితి కంటే తక్కువగా ఉన్నప్పటికీ. స్థిరమైన పన్ను రికార్డును నిర్వహించడం వలన ప్రాపర్టీని చివరకు అమ్మినప్పుడు అన్ని అంశాలూ సులభతరం అవుతాయని పేర్కొంటున్నారు.

పాత పన్ను విధానంలో భారతదేశంలో పన్ను విధించదగిన ఆదాయం ఉంటే, సెక్షన్ 80 సి కింద గృహ రుణ ప్రిన్సిపల్, ఆదాయపు పన్ను చట్టంలోని సెక్షన్ 24(b) కింద గృహ రుణ వడ్డీపై తగ్గింపులను క్లెయిమ్ చేసుకోవచ్చు. కొత్త రెమిటెన్స్ పన్ను విధానానికి వస్తే.. అమెరికా పౌరులు కానివారు పంపే నిధులపై 3.5 శాతం అమెరికా ఎక్సైజ్ పన్ను విధిస్తారు. దీనివల్ల ఇండియాలో పెట్టుబడి వ్యయం పెరుగుతుంది. అందువల్ల ఎన్నారైలు ఈ ఖర్చును కూడా లెక్కించాలి. ఇండియాలో ఇన్ వర్డ్ రెమిటెన్స్ పై పన్ను లేదు. అందువల్ల బ్యాంకింగ్ మార్గాల ద్వారా వచ్చే నిధులను పూర్తిగా వినియోగించుకోవచ్చు. అమెరికా ఎక్సైజ్ సుంకం భారం తగ్గించుకోవాలంటే.. వీలైతే అమెరికా పౌరసత్వం ఉన్నవారి ద్వారా నిధులు పంపొచ్చు.

• ఇండియాలో ప్రాపర్టీ కొనాలంటే ఈ పత్రాలు తప్పనిసరి..
• ఎన్నారైలు భారతదేశంలో ప్రాపర్టీ కొనుగోలు చేయాలంటే కింద పేర్కొన్న పత్రాలు తప్పనిసరిగా ఉండాలి.
• పాస్‌పోర్ట్, ఓసీఐ /ఫీఐఓ కార్డ్: చెల్లుబాటు అయ్యే పాస్‌పోర్ట్ తప్పనిసరి. మీరు ఓవర్సీస్ సిటిజన్ ఆఫ్ ఇండియా (ఓసీఐ) లేదా పర్సన్ ఆఫ్ ఇండియన్ ఆరిజిన్ (పీఓఊ) కార్డు కలిగి ఉంటే, దానిని భారతీయ పాస్‌పోర్ట్ కు బదులుగా ఉపయోగించవచ్చు.
• పాన్ కార్డ్: పన్ను ప్రయోజనాల కోసం పాన్ కార్డ్ అవసరం. ముఖ్యంగా మీరు ప్రాపర్టీని అద్దెకు ఇవ్వాలనుకున్నా.. లేదా తర్వాత అమ్మాలనుకున్నా ఇది ఉండాల్సిందే.
• చిరునామా రుజువు: భారతీయ, విదేశీ చిరునామా రుజువు (యుటిలిటీ బిల్లులు, బ్యాంక్ స్టేట్‌మెంట్‌లు లేదా అద్దె ఒప్పందాలు) రెండూ అవసరం కావచ్చు.
• పవర్ ఆఫ్ అటార్నీ(వర్తిస్తే): ప్రాపర్టీ కొనుగోలు విషయంలో ఎన్నారైలు భౌతికంగా ఇండియాలో లేని పక్షంలో రిజిస్టర్డ్ లేదా నోటరీ చేయబడిన పవర్ ఆఫ్ అటార్నీ ద్వారా ఎవరికైనా అధికారం ఇవ్వవలసి ఉంటుంది. తద్వారా మీ తరఫున అవసరమైన పనులన్నీ సదరు వ్యక్తి చూసుకుంటారు.

వ్యక్తిగత శ్రద్ధ

ప్రాపర్టీ కొనుగోలు విషయంలో పైన చెప్పిన విషయాలన్నీ ఒక ఎత్తైతే.. ప్రాపర్టీని ఎంచుకోవడం మరో ఎత్తు. ప్రాపర్టీ కొనుగోలు చేసే ముందు అన్న అంశాలను క్షుణ్నంగా పరిశీలించుకోవాలి. ముఖ్యంగా విశ్వసనీయ ట్రాక్ రికార్డు ఉన్న ప్రఖ్యాత డెవలపర్‌ను ఎంచుకోవాలి. ఎంచుకున్న నగరం మీరు తిరిగి వచ్చిన తర్వాత ఉపాధిని అందించాలి. ప్రాజెక్టు లొకేషన్ భౌతిక, సామాజిక మౌలిక సదుపాయాలు కలిగి ఉండేలా చూసుకోవాలి. అంతర్జాతీయ విమానాశ్రాయ కనెక్టివిటీ కలిగి ఉండాలి. ప్రాజెక్టుకు అన్ని అనుమతులు ఉన్నాయో లేదో చూడాలి. చట్టపరమైన సమస్యలు ఏమైనా ఉన్నాయేమో తనిఖీ చేసుకోవాలి.