ఐదేళ్ల గరిష్ట స్థాయికి పారిశ్రామిక లీజింగ్

దేశంలో పారిశ్రామిక, లాజిస్టిక్స్ రంగం ఈ ఏడాది మరింత దూకుడు ప్రదర్శిస్తుందని, ఐదేళ్ల గరిష్ట స్థాయిని చేరుకుంటుందని ప్రముఖ కన్సల్టింగ్ సంస్థ సీబీఆర్ఈ సౌత్ ఏసియా ప్రైవేట్ లిమిటెడ్ పేర్కొంది. 2023లో దేశంలోని ఎనిమిది ప్రధాన నగరాల్లో పారిశ్రామిక, లాజిస్టిక్స్ రంగం లీజింగ్ 36 నుంచి 38 మిలియన్ చదరపు అడుగులకు చేరుకుంటుందని అంచనా వేసింది. సరఫరా కూడా 35 నుంచి 37 మిలియన్ చదరపు అడుగులకు చేరుకోవచ్చని తెలిపింది.

2023 జనవరి-సెప్టెంబర్ లో పారిశ్రామిక, లాజిస్టిక్స్ లీజింగ్ వార్షిక ప్రాతిపదికన 13 శాతం పెరుగుదల నమోదైందని సీబీఆర్ఈ నివేదిక పేర్కొంది. 2022 జనవరి-సెప్టెంబర్ లో దేశంలోని ఎనిమిది ప్రధాన నగరాల్లో 24.2 మిలియన్ చదరపు అడుగుల లీజింగ్ జరగ్గా.. 2023 జనవరి-సెప్టెంబర్ లో 27.3 మిలియన్ చదరపు అడుగులుగా నమోదైనట్టు వివరించింది. ఇందులో ముంబై, చెన్నై, ఢిల్లీ కలిసి 56 శాతం వాటా కలిగి ఉన్నాయి. ఇక థర్డ్ పార్టీ లాజిస్టిక్స్ ప్లేయర్లు 45 శాతం వాటాతో లీజింగ్ లో ఆధిపత్యం చెలాయించగా.. ఇంజనీరింగ్ అండ్ మాన్యుఫ్యాక్చరింగ్ కంపెనీలు 15 శాతం, ఆటో, అనుబంధ రంగాలు 7 శాతం, ఎఫ్ఎంసీజీ 6 శాతం, ఎలక్ట్రానిక్స్ అండ్ ఎలక్ట్రికల్స్ 5 శాతం వాటా కలిగి ఉన్నాయి. అలాగే సరఫరా 57 శాతం పెరిగి 28 మిలియన్ చదరపు అడుగులకు చేరింది. సరఫరాలో ఢిల్లీ, చెన్నై, కోల్ కతా కలిసి 56 శాతం వాటా కలిగి ఉన్నాయి.