జయత్రి ఇన్ ఫ్రాస్టక్చర్స్ ప్రాజెక్టు నిలిపివేత

పలు ఫిర్యాదలు నేపథ్యంలో తెలంగాణ రెరా నిర్ణయం

జయ డైమండ్ పేరుతో రెరాలో నమోదైన ప్రాజెక్టు పనులను తక్షణమే నిలిపివేయాలని జయత్రి ఇన్ ఫ్రాస్టక్చర్స్ ప్రైవేట్ లిమిటెడ్ ను తెలంగాణ రెరా ఆదేశించింది. ఈ ప్రాజెక్టుకు సంబంధించి పలు ఫిర్యాదులు వచ్చిన నేపథ్యంలో రెరా ఈ నిర్ణయం తీసుకుంది. ఫిర్యాదుదారులు శ్రీవత్సల, మరికొందరు కలిసి జయ డైమండ్స్ వెల్ఫేర్ అసోసియేషన్ గా ఏర్పడి రెరాకు సంయుక్తంగా ఫిర్యాదు చేశారు. డెవలపర్ కు ఎన్నిసార్లు చెప్పినా.. నిర్మాణాన్ని పూర్తి చేయడంలో విఫలమయ్యారని అందులో పేర్కొన్నారు. ఈ నేపథ్యంలో ఫిర్యాదును పరిశీలించిన రెరా.. ఈ ప్రాజెక్టుకు సంబంధించిన అన్ని ప్రమోషన్, ఇతర లావాదేవీలతోపాటు బుకింగ్ సంబంధిత చర్యలన్నీ తక్షణమే నిలిపివేయాలని ఆదేశించింది.

ALSO READ: మూసీ నది ప్రక్షాళనకు ప్రణాళికలు సిద్ధం..

అలాగే ప్రాజెక్టుకు సంబంధించిన భూమి లేదా అందులో భాగం, అలాగే ఏదైనా యూనిట్ ను మార్చడం లేదా బదిలీ చేయడం వంటివి కూడా చేయొద్దని స్పష్టంచేసింది. అంతేకాకుండా ఈ ప్రాజెక్టుకు సంబంధించి ఎలాంటి రిజిస్ట్రేషన్లూ చేయొద్దని సబ్ రిజిస్టార్ కార్యాలయాలకు సూచించింది. ప్రాజెక్టు రిజిస్ట్రేషన్ ను సస్పెన్షన్ లో ఉంచడంతోపాటు ఆన్ లైన్ యాక్సెస్ బ్లాక్ చేయాలని, ప్రాజెక్టు బ్యాంకు ఖాతాను ఫ్రీజ్ చేయాలని, ఈ ఉత్తర్వులను టీజీ రెరా వెబ్ పేజీలో అందుబాటులో ఉంచాలని టీజీ రెరా కార్యదర్శిని ఆదేశించింది. తదుపరి ఉత్తర్వులు వెలువడే వరకు ఈ ఆదేశాలు అమల్లో ఉంటాయని పేర్కొంది. ఈ కేసులో తదుపరి విచారణను ఏప్రిల్ 25కి వాయిదా వేసింది.