చిన్న బిల్డ‌ర్ల‌ను పెద్ద మ‌న‌స్సుతో.. ప్రభుత్వ‌మే ఆదుకోవాలి!
న‌రెడ్కో వెస్ట్ జోన్ బిల్డ‌ర్స్ అసోసియేష‌న్‌ నూత‌న అధ్య‌క్షుడు ఎం. ప్రేమ్ కుమార్
చిన్న బిల్డ‌ర్లు ఎదుర్కొనే స‌మ‌స్య‌ల్ని ప్ర‌భుత్వం దృష్టికి తీసుకెళ్లి పరిష్క‌రించేందుకు కృషి చేస్తాన‌ని ఎం. ప్రేమ్ కుమార్ తెలిపారు. ఇటీవ‌ల న‌రెడ్కో వెస్ట్ జోన్ బిల్డ‌ర్స్ అసోసియేష‌న్‌కి అధ్య‌క్షుడిగా ఎన్నికైన ఆయ‌న రియల్ ఎస్టేట్ గురుతో ప్ర‌త్యేకంగా మాట్లాడుతూ.. బ‌హుళ అంత‌స్తుల‌కు జీహెచ్ఎంసీ ప్ర‌ధాన కార్యాల‌యంలో అనుమ‌తుల్ని మంజూరు చేయాల‌న్నారు. ఇంకా ఏమ‌న్నారో ఆయ‌న మాటల్లోనే..
న‌గ‌రంలోని వివిధ ప్రాంతాల్లో 900 గ‌జాలు లేదా ఆపై విస్తీర్ణంలో క‌ట్టే అపార్టుమెంట్ల‌ను క‌ట్టేట‌ప్పుడు సెల్లార్లు తవ్వాలంటే ఎన్నో ఇబ్బందుల్ని ఎదుర్కోవాల్సి వ‌స్తుంది. ఈ సైటు ప‌క్క‌న నివ‌సించేవారు, వ‌ర్క్ ఫ్ర‌మ్ హోమ్ చేసే ఐటీ ఉద్యోగులు అనేక స‌మ‌స్య‌లు ఎదుర్కొంటున్నారు. అందుకే, చిన్న సైట్ల‌లో అపార్టుమెంట్ల‌ను క‌ట్టేవారికి సెల్లార్ బ‌దులు 2 స్టిల్ట్ ప్ల‌స్ 5 అంత‌స్తుల‌ను క‌ట్టేందుకు ఫైర్ ఎన్వోసీ లేకుండా జీహెచ్ఎంసీ అనుమ‌తిని మంజూరు చేయాలి. ఇలా చేస్తే సెల్లార్ల‌ను త‌వ్వే మ‌ట్టితో నాలాలు, చెరువులను పూడ్చే ప‌ని ఉండ‌దు. ప‌ర్యావ‌ర‌ణం దెబ్బ‌తిన‌దు. కాబ‌ట్టి, ఈ అంశానికి గ‌ల ప్రాధాన్య‌త‌ను దృష్టిలో పెట్టుకుని జీహెచ్ఎంసీ నిర్ణ‌యం తీసుకోవాలి. ఈ చిన్న క‌ట్ట‌డాల‌కు అనుమ‌తిని స్థానిక జీహెచ్ఎంసీ కార్యాల‌యాల్లోనే మంజూరు చేయాలి. ఇలా చేస్తే.. న‌గ‌రంలోని వివిధ ప్రాంతాల్నుంచి అనుమ‌తి కోసం ప్ర‌ధాన కార్యాల‌యం చుట్టూ తిరిగే బాధ త‌ప్పుతుంది.
స్థిర నివాసం ఏర్పాటు చేసుకోవాల‌ని భావించేవారు నేటికీ న‌గ‌రంలోని ప్ర‌ధాన ప్రాంతాల్లో స్థిర నివాసం ఏర్పాటు చేసుకుంటున్నారు. గ‌త కొంతకాలం నుంచి మార్కెట్లో అమ్మ‌కాలు స్వ‌ల్పంగా త‌గ్గుముఖం ప‌ట్టాయి.. కాక‌పోతే, న‌గ‌రంలో స్థిర నివాసం ఏర్పాటు చేసుకోవ‌డానికి ఇదే స‌రైన త‌రుణం. వాస్త‌వానికి, శివారు ప్రాంతాల్లో ప్లాట్లు, ఫ్లాట్లు, వ్య‌క్తిగ‌త గృహాల్ని అధిక శాతం మంది అద్దెల కోస‌మో లేక పెట్టుబ‌డి నిమిత్త‌మో కొనుగోలు చేస్తుంటారు. ఫ్లాట్లు కొనేవారిలో అధిక శాతం మంది అక్క‌డ ఉండేందుకే మొగ్గు చూపుతుంటారు. అయితే, శివార్ల‌లోని రియల్ రంగంలో ఈమ‌ధ్య లావాదేవీలు కొంత‌మేర‌కు త‌గ్గుముఖం ప‌ట్టాయి. కాక‌పోతే, న‌గ‌రంలోని కీల‌క ప్రాంతాల్లో ఫ్లాట్ల‌ను కొన‌డానికి నేటికీ చాలామంది ఆస‌క్తి చూపిస్తున్నారు. ప్ర‌ధానంగా, గృహ‌ప్ర‌వేశానికి సిద్ధంగా ఉన్న ఇళ్ల‌ను ఎంచుకోవ‌డానికి ఇష్ట‌ప‌డుతున్నారు. సొంతిల్లు అనేది ఎప్ప‌టికైనా కొనుక్కోవాలి కాబ‌ట్టి, వీరికి మార్కెట్‌తో పెద్ద‌గా సంబంధం ఉండ‌దు. ఈ ఒక్క కార‌ణం వ‌ల్లే చాలామంది ఫ్లాట్ల‌ను ఎంచుకోవ‌డానికి మొగ్గు చూపుతున్నారు. ఎందుకో తెలుసా? రానున్న రోజుల్లో ఫ్లాట్ల ధ‌ర‌లు మ‌రింత‌గా పెరిగే అవ‌కాశం ఉంది. పెరిగిన భూముల ధ‌ర‌లు, నిర్మాణ వ్య‌యం వంటి అంశాల్ని ప‌రిగ‌ణ‌న‌లోకి తీసుకుంటే.. ప్ర‌స్తుతం సొంతిల్లు కొనుక్కోవ‌డ‌మే మేలు. ఎందుకంటే, రానున్న రోజుల్లో ఫ్లాట్ల రేట్లు పెరుగుతాయే త‌ప్ప త‌గ్గే అవ‌కాశ‌మే ఉండ‌దు.