బెంగళూరులో అద్దెకిస్తున్న కారు గ్యారేజీలు, స్టోర్ రూములు
బెంగళూరులో ఇంచ్ ఇంచ్ ఇంపార్టెంటే
అద్దెల కోసం కొత్త పుంతలు తొక్కుతున్న యజమానులు
350 చదరపు అడుగుల్లోపే సింగిల్ బెడ్ రూమ్ ఫ్లాట్
బెంగళూరు.. ఐటీ రాజధాని. ఇక్కడ అద్దెల గురించి ప్రత్యేకంగా చెప్పక్కర్లేదు. అద్దెలూ ఎక్కువే.. సెక్యూరిటీ డిపాజిట్టూ ఎక్కువే. అందువల్ల ప్రతి అంగుళమూ ముఖ్యమే. అత్యంత చిన్న ఫ్లాట్ అద్దె కూడా రూ.20వేలకు పైనే ఉంటున్నాయి. దీంతో అద్దె కోసం సింగిల్ బెడ్ రూమ్ ఫ్లాట్ స్థలాన్ని కూడా రెండు ఫ్లాట్లుగా మార్చేస్తున్నారు. 350 చదరపు అడుగుల కంటే తక్కువ స్థలంలో సింగిల్ బెడ్ రూమ్ ఫ్లాట్లు ఉంటున్నాయి. చివరకు గ్యారేజీలు, స్టోర్ రూమ్స్ ను సైతం కొంచెం మార్చి అద్దెకు ఇచ్చేస్తున్నారు.
350 చదరపు అడుగుల కంటే తక్కువ విస్తీర్ణంలో ఉండే సింగిల్ బెడ్ రూమ్స్ ఫ్లాట్లను పరిశీలిస్తే.. లివింగ్ రూమ్‌లో సోఫాకు తగినంత స్థలం కూడా ఉండదు. అటూ ఇటూ స్వేచ్చగా తిరిగే వెసులుబాటు కూడా కనిపించదు. నిజానికి 2023 నుంచి బెంగళూరులో కోరమంగళ, సర్జాపూర్ రోడ్, వైట్‌ఫీల్డ్, బెల్లాండూర్‌ సహా అధిక డిమాండ్ ఉన్న ప్రాంతాలలో వార్షిక అద్దె 35 శాతం వరకు పెరిగింది. కరోనా సమయంలో వచ్చిన నష్టాలను భర్తీ చేసుకోవడానికి ఇంటి యజమానులు ప్రయత్నించడం.. ఉద్యోగులు తిరిగి ఆఫీసులకు వస్తుండటంతో అద్దె ఇళ్లకు డిమాండ్ పెరిగి అద్దెలు పెరిగాయి. ప్రస్తుతం బెంగళూరు గృహ సంక్షోభాన్ని ఎదుర్కొంటోంది. అపార్ట్ మెంట్ అద్దెలు విపరీతంగా పెరిగిపోవడంతో అద్దెదారులు ఒత్తిడికి గురవుతున్నారు. అద్దె ఆదాయాన్ని పెంచడానికి ఆస్తి యజమానులు డిమాండ్-సరఫరా అసమతుల్యతను ఉపయోగించుకుంటున్నందున ఇది అసాధారణ అద్దె స్థలాల పెరుగుదలకు దారితీసింది. అలాగే హౌసింగ్ ఇన్వెంటరీ కొరత అసాధారణ అద్దె స్థలాల పెరుగుదలకు దారితీసింది.
బెంగళూరు నగర కేంద్రం సమీపంలో అద్దె అపార్ట్ మెంట్‌లకు డిమాండ్ పెరుగుతున్నందున.. ప్రాపర్టీ యజమానులు అసాధారణ నిర్ణయాలు తీసుకుంటున్నారు. కొంతమంది ఇంటి యజమానులు కార్ గ్యారేజీలను కాంపాక్ట్ సింగిల్ బెడ్ రూమ్ యూనిట్లుగా మార్చి నెలకు రూ.20వేలకు పైగా అద్దె వసూలు చేస్తున్నారు. ఇటీవల ప్రైమ్ కోరమంగళలో ఒక ఇంటి యజమాని తన గ్యారేజీని వన్ బీహెచ్ కే మార్చి నెలకు రూ.25వేల చొప్పున అద్దెకు ఇచ్చాడు. ఇందిరానగర్ యజమాని మెట్ల కింద ఉన్న యుటిలిటీ గదిని కుటుంబం ఉండేటట్టుగా సింగిల్ రూమ్ విత్ కిచెన్ గా మార్చి నెలకు రూ.15 వేల అద్దె నిర్ణయించాడు. నగర కేంద్రానికి సమీపంలో అందుబాటులో ఉన్న ఇన్వెంటరీ కొరత కారణంగా గత సంవత్సరం ప్రధాన ప్రాంతాలలో అద్దె ధరలు 10 నుంచి 15 శాతం మేర పెరిగాయి.
కోరమంగళ, ఇందిరానగర్, హెచ్ఎస్ ఆర్ లే అవుట్, హెబ్బాల్ వంటి ప్రాంతాలలో, గేటెడ్ కమ్యూనిటీలలోని 2 బీహెచ్ కే అపార్ట్ మెంట్‌లు ఇప్పుడు సౌకర్యాలను బట్టి నెలకు రూ.40,000 నుంచి రూ.50వేల మధ్య అద్దెలు పలుకుతున్నాయి. కాగా, బెంగళూరులోని ప్రధాన ప్రదేశాలలో అద్దెలు పెరుగుతున్నప్పటికీ, నగర శివార్లలో కాస్త అందుబాటు ధరల్లో అద్దె ఇళ్లు దొరుకుతున్నాయి. వైట్‌ఫీల్డ్ సమీపంలోని బాగలూరు వంటి ప్రాంతాల్లో నెలకు దాదాపు రూ,27వేలకు 2 బీహెచ్ కే ఇళ్లు దొరుకుతున్నాయి. కోరమంగళ మరియు వైట్‌ఫీల్డ్ శివార్లలో ఉన్న బీటీఎం లేఅవుట్ వంటి ప్రాంతాల్లో అనేక వన్ బీహెచ్ కేలు నెలకు రూ.15 వేల నుంచి రూ.20వేల వరకు అందుబాటులో ఉన్నాయి. కొన్నిచోట్ల రూ.12వేల కంటే తక్కువకే వస్తున్నాయి.