- ప్రీలాంచులు చేస్తాం..
- మ‌మ్మ‌ల్ని ఎవ‌రేం చేయ‌లేరు!
- హ‌మారే పీచే కౌన్ హై మాలూమ్‌?
హైదరాబాద్ రియల్ రంగంలో కొంద‌రు బిల్డ‌ర్ల‌కు టీఎస్ రెరా అంటే ఏమాత్రం భ‌యం లేకుండా పోయింది. అందుకే విచ్చ‌ల‌విడిగా ప్రీలాంచుల్లో ఫ్లాట్లు, విల్లాల్ని విక్ర‌యిస్తున్నారు. ఈ సంస్థ‌ల‌కు ప్ర‌భుత్వంలో కొంద‌రు పెద్ద త‌ల‌కాయ‌ల అండ‌దండ‌లు ఉంట‌డ‌మే ఇందుకు ప్ర‌ధాన కార‌ణం. అందుకే, ప‌లువురు బిల్డ‌ర్లు టీఎస్ రెరా ఛైర్మ‌న్ అంటే పెద్ద భ‌యం లేకుండా పోయింది. బెంగ‌ళూరుకు చెందిన ఒక నిర్మాణ సంస్థ ఏం చేస్తుందంటే.. ఛానెల్ పార్ట్‌న‌ర్ల‌తో ప్రీలాంచ్ వ్యాపారాన్ని స‌జావుగా కొన‌సాగిస్తుంది. కొనుగోలుదారులు ఇచ్చే అడ్వాన్స్ పేమెంట్ చెక్కుల్ని ఆయా ఛానెల్ పార్ట్‌న‌ర్లు త‌మ వ‌ద్ద అట్టి పెట్టుకుంటున్నారు. రెరా నెంబ‌ర్ వ‌చ్చాకే ఆయా చెక్కుల్ని తీసుకుంటామ‌ని ఆయా ఛానెల్ పార్ట్‌న‌ర్ల‌కు బెంగళూరు సంస్థ చెప్ప‌డ‌మే ఇందుకు ప్ర‌ధాన కార‌ణ‌మ‌ని తెలుస్తోంది.
కూక‌ట్‌ప‌ల్లి ఐడీఎల్ చెరువు స‌మీపంలో మ‌రో సంస్థ ప్రీలాంచ్ వ్యాపారాన్ని ఆరంభించింది. ఈ సంస్థ ఇప్ప‌టివ‌ర‌కూ న‌గ‌రంలో ఒక్క ప్రాజెక్టు కూడా పూర్తి చేయ‌లేదు. అయినా, ఒకటి త‌ర్వాత మ‌రొక ప్రాజెక్టును మొద‌లెడుతూ.. కొనుగోలుదారుల నుంచి భారీగా సొమ్మును వ‌సూలు చేస్తోంది. అంటే, మ‌ల్టీలెవెల్ మార్కెటింగ్ త‌ర‌హాలో ప్రీలాంచ్ అమ్మ‌కాల్ని చేప‌డుతున్న ఈ సంస్థ ప‌ట్ల ఇప్ప‌టికైనా కొనుగోలుదారులు అప్ర‌మ‌త్తంగా ఉండాలి.
