కొత్త ఇల్లు కొనుగోలుదారులకు బెంగాల్ సీఎం మమతా బెనర్జీ శుభవార్త చెప్పారు. స్టాంప్ డ్యూటీలో 2 శాతం మినహాయింపుతోపాటు సర్కిల్ రేట్లలో 10 శాతం తగ్గింపును మరో రెండు నెలలపాటు అమలు చేయనున్నట్టు ప్రకటించారు. బడ్జెట్ లో ప్రకటించిన రాయితీల మేరకు ఈ రెండూ అక్టోబర్ 30 వరకు అమలు చేయాల్సి ఉంది. అయితే, మరో రెండు నెలలపాటు.. అంటే డిసెంబర్ 31 వరకు ఈ రాయితీలను పొడిగిస్తూ మమత తాజాగా నిర్ణయం తీసుకున్నారు. ఈ రాయితీలు ప్రకటించడం వల్ల జూలై-సెప్టెంబర్ త్రైమాసికంలో ఇళ్ల అమ్మకాలు గణనీయంగా పెరిగాయి.
గతేడాది ఇదే కాలంతో పోలిస్తే 75 శాతం పెరుగుదల నమోదైంది. ఈ మినహాయింపును పొందేందుకు పలువురు కొనుగోలుదారులు రిజిస్ట్రేషన్ ఆఫీసుల వద్ద బారులు తీరారు. ఈ నేపథ్యంలో ఈ మినహాయింపులను మరికొంతకాలం పొడిగించాలని క్రెడాయ్ వెస్ట్ బెంగాల్.. ముఖ్యమంత్రి మమతా బెనర్జీని కోరింది. దీంతో ఆమె ఈ మినహాయింపులను మరో రెండు నెలలపాటు పొడిగించారు. కాగా, సీఎం తీసుకున్న నిర్ణయంపై క్రెడాయ్ వెస్ట్ బెంగాల్ అధ్యక్షుడు సుశీల్ మొహతా హర్షం వ్యక్తంచేశారు. దీనివల్ల అటు రాష్ట్రానికి ఆదాయం రావడంతో పాటు ఇళ్ల కొనుగోలుదారులకు భారీ ఉపశమనం లభిస్తుందని పేర్కొన్నారు.
