బెంగళూరులో ప్లాట్ కొంటున్నారా?

ఈ వివరాల మీ కోసమే

సాఫ్ట్ వేర్ ఇంజనీర్ గా పనిచేస్తున్న రాజేష్ బెంగళూరులో రెసిడెన్షియల్ ప్లాట్ కొనాలని చూస్తున్నాడు. ఉత్తర బెంగళూరులో 1350 చదరపు అడుగుల విస్తీర్ణంలో ఉన్న ప్లాట్ ధరలు దాదాపు రూ.50 లక్షల వరకు ఉన్నాయి. 15 ఏళ్ల తర్వాత తన రిటైర్మెంట్ హోమ్ గా ఉపయోగించుకునేలా ప్లాట్ లో పెట్టుబడి పెట్టాలని.. లేదా తన పెట్టుబడికి మంచి రాబడి వస్తే విక్రయించాలని భావిస్తున్నాడు. ఈ నేపథ్యంలో ప్లాట్ కొనే ముందు ఏమేం అంశాలు ఆలోచించాలా అని పలువురిని వాకబు చేశాడు. మీరు కూడా బెంగళూరులో ప్లాట్ కొనాలని భావిస్తుంటే.. ఈ అంశాలు మీకు ఉపయోగపడతాయి.

బెంగళూరులోని ప్లాట్లలో పెట్టుబడి పెట్టాలనుకునే కొనుగోలుదారులు స్థలం, భూమిని విక్రయించే డెవలపర్ రకం, ప్రాజెక్ట్ అందించే సౌకర్యాలను ప్రధానంగా పరిగణనలోకి తీసుకోవాలి. గత కొన్నేళ్లుగా రియల్ ఆదాయం బాగుండటంతో కొనుగోలుదారులకు ప్లాట్లు ఆకర్షణీయమైన పెట్టుబడి ఎంపికగా మారాయి. బెంగుళూరులోని కొన్ని ప్రాంతాల్లో అపార్ట్ మెంట్లు, విల్లాల కంటే ప్లాట్‌ల అభివృద్ధి గణనీయంగా పెరిగింది. కరోనా తర్వాత దేవనహళ్లి, కోరమంగళ, ఇందిరానగర్‌లకు సమీపంలోని భూముల ధరలు పెరిగాయని రియల్ ఎస్టేట్ నిపుణులు చెబుతున్నారు. వారి అభిప్రాయం ప్రకారం ఉత్తర బెంగళూరులోని దేవనహళ్లి, హెన్నూరు, బాగలూరు, యలహంక శివార్లలో ప్లాట్ల ధరలు పెరిగాయి. తూర్పు ఐటీ కారిడార్‌లోని వైట్‌ఫీల్డ్, సరజ్‌పూర్ రోడ్, వర్తూర్, పానత్తూరు మరియు పరిసర ప్రాంతాలలో కూడా ధరలు పెరిగాయి. సబర్బన్ రైలు, పెరిఫెరల్ రింగ్ రోడ్, బెంగళూరు శాటిలైట్ టౌన్ రింగ్ రోడ్ వంటి రాబోయే మౌలిక సదుపాయాలు భూముల ధరల పెరుగుదలలో కీలంగా ఉన్నాయని చెబుతున్నారు.

ఉత్తర బెంగళూరులోని దేవనహళ్లి చుట్టుపక్కల ఉన్న గ్రేడ్ ఏ డెవలపర్లు అభివృద్ధి చేసిన ప్రాజెక్టుల్లో 1200 చదరపు అడుగుల ప్రాథమిక ప్లాట్ ధర చదరపు అడుగుకు రూ.7వేల నుంచి ప్రారంభమవుతున్నాయి. ఉత్తరాదిలోని హెన్నూర్, బాగలూరు వంటి ఇతర ప్రాంతాలలో ప్లాట్లు చదరపు అడుగులకు రూ.6000 నుంచి వస్తున్నాయి. అదే చిన్న ప్రాజెక్టుల్లో అయితే చదరపు అడుగు ధర రూ.4వేల నుంచి మొదలవుతున్నాయి.

బెంగళూరులో ప్రణాళికాబద్ధమైన అభివృద్ధి 15 నుంచి 20 శాతం రేటుతో సాగుతోందని రియల్ ఎస్టేట్ డెవలపర్లు చెబుతున్నారు. అయితే, ఇది స్థలం, భూమిని విక్రయించే డెవలపర్ రకంపై కూడా ఆధారపడి ఉంటుందని పేర్కొంటున్నారు. ఈ నేపథ్యంలో కొనుగోలుదారు ప్రాజెక్ట్ అందించే సౌకర్యాల వంటి అంశాలను చూడాలని.. కనెక్టివిటీ బాగా ఉన్న ప్రదేశంలో గేటెడ్ కమ్యూనిటీలకు మంచి భవిష్యత్తు ఉంటుందని చెబుతున్నారు.

ప్రస్తుతం బెంగళూరులో చాలా చోట్ల అభివృద్ధి ప్రాజెక్టుల్లో విలాసవంతమైన క్లబ్‌హౌస్‌లు, ఈత కొలనులు, పచ్చిక మైదానాల వంటి సౌకర్యాలను అందిస్తున్నారు. ఇవి భూమి ధరను పెంచుతాయని, పెట్టుబడులకు సురక్షితమైన ఎంపిక అని డెవలపర్లు పేర్కొంటున్నారు. ఏదైనా ప్రాజెక్టులో పెట్టుబడి పెట్టడానికి ముందు పెండింగ్‌లో ఉన్న లిటిగేషన్లు, బిల్డర్ సామర్థ్యాల గురించి క్షుణ్ణంగా బ్యాక్‌గ్రౌండ్ చెక్ చేయాలని నిపుణులు సూచిస్తున్నారు.