జీవో 59 ప్రకారం యూఎల్‌సీ కింద.. అభ్యంతరం లేని ప్రభుత్వ భూమి మరియు మిగులు భూముల క్రమబద్ధీకరణకు 2014 మాదిరిగా తహశీల్దార్లకు అధికారమిస్తూ సీసీఎల్ఏ తాజాగా నిర్ణయం తీసుకుంది. ఈ మేరకు భూపరిపాలన చీఫ్ కమిషనర్ తాజాగా ప్రత్యేక సర్య్కులర్ ను జారీ చేశారు. దీని ప్రకారం.. కన్వేయన్స్ డీడ్ ఆమోదం మరియు అమలు చేసేందుకు తహశీల్దార్లకు అధికారమిస్తూ.. రాష్ట్ర ప్ర‌భుత్వం ప‌లు సూచ‌న‌ల్ని జారీ చేసింది. అవేమిటంటే..
తహశీల్దార్ లాగిన్‌లో 2014లో ఉన్న కన్వేయన్స్ డీడ్ ఫార్మాట్ ను ప్రారంభించారు. జీవో నెం 59 సిఫార్సుకు అనుగుణంగా పూర్తి సొమ్ము చెల్లించిన ద‌ర‌ఖాస్తుదారుల‌కు ఇది అందుబాటులోకి వ‌స్తుంది.
ఇందుకోసం సంబంధిత తహశీల్దార్ మీసేవా వెబ్ పోర్టల్లో లాగిన్ అవ్వాలి.
అప్లికేషన్ ప్రాసెసింగ్ మెనులో జీవో నెం.59 డీడ్ ఆఫ్ కన్వేయన్స్ ద్వారా తహశీల్దార్ ఎంపిక అందుబాటులో ఉంది.
కన్వేయన్స్ డీడ్ల‌ను త‌యారు చేయ‌డంతో పాటు అందించేందుకు త‌హ‌శీల్దారు పూర్తి బాధ్య‌త వ‌హించాల్సి ఉంటుంది. కన్వేయన్స్ డీడ్‌ను చూసేందుకు, తహశీల్దార్ దరఖాస్తును త‌నిఖీ చేయాల్సి ఉంటుంది. సంఖ్యల వారీగా లేదా గ్రామాల వారీగా, వాటి వివరాలు దరఖాస్తుదారు మరియు ఇతర వివరాలు తెరపై కనిపిస్తాయి.
కన్వేయన్స్ డీడ్ డౌన్‌లోడ్ చేసుకునే ముందు తహశీల్దార్ వివరాలను క్రాస్ చెక్ చేసుకోవాలి.
దరఖాస్తును ఆమోదించిన తర్వాత, బయో మెట్రిక్ ప్రమాణీకరణతో ‘కన్వేయన్స్ డీడ్స డౌన్ లోడ్ చేసుకోవాలి.
‘బయోమెట్రిక్ అథెంటికేషన్ తో కన్వేయన్స్ డీడ్ క్యూఆర్ కోడ్‌తో స‌హా జ‌న‌రేట్ అవుతుంది. ఇందుకు సంబంధించిన ప్రింట‌వుట్ మూడు పేజీల‌తో క‌లిపి తీసుకోవాలి.
ప్రింట్ అవుట్ తీసుకున్న తర్వాత, సంబంధిత తహశీల్దార్ తన సంతకం & తన కార్యాలయ ముద్రను కన్వేయన్స్ డీడ్‌పై వేయాలి.
సబ్ రిజిస్ట్రార్‌లు కన్వేయన్స్ డీడ్ ను ఉచితంగా రిజిస్ట‌ర్ చేయాలి. స్టాంప్ డ్యూటీ, రిజిస్ట్రేష‌న్ ఛార్జీలు, ట్రాన్స్‌ఫ‌ర్ డ్యూటీ చెల్లించ‌క్క‌ర్లేదు.
కన్వేయన్స్ డీడ్ల‌ను ల‌బ్దిదారుల‌కు ప్ర‌జా ప్ర‌తినిధులు అంద‌జేయాలి. వీటికి అంద‌జేసే రోజు జిల్లా యంత్రాంగం ప్రత్యేక ఏర్పాట్ల‌ను చేయాలి.
జీవో నెం 59 కింద కన్వేయెన్స్ డీడ్ జారీ చేసిన రోజున, దరఖాస్తుదారునికి తహశీల్దార్ సంతకంతో కన్వేయన్స్ డీడ్ అమలు చేయడానికి మరియు సబ్ రిజిస్ట్రార్ ద్వారా పత్రాన్ని నమోదు చేయడానికి జిల్లా పరిపాలన అవసరమైన ఏర్పాట్ల‌ను చేయాల్సి ఉంటుంది.
మీ సేవా పోర్టల్లో కన్వేయన్స్ డీడ్ కాపీని అప్లోడ్ చేయాలి. ఇందుకు సంబంధించి జిల్లా క‌లెక్ట‌ర్ త‌గిన ఏర్పాట్ల‌ను చేయాలి.
