జీ స్క్వేర్ సరికొత్త మోసం.. ప్లాట్లు కొనవద్దని టీఎస్ రెరా హెచ్చరిక

HMDA MUST CANCEL EPITOME PERMISSION

200 ఎక‌రాల‌కు రెరా అనుమ‌తి తీసుకుని..

1200 ఎక‌రాల్లో ప్లాట్ల అమ్మ‌కం
14 సంస్థల వెంచ‌ర్ల‌లో ప్లాట్లు కొని మోస‌పోవ‌ద్దు
తెలంగాణ రెరా హెచ్చ‌రిక‌
ప్రీలాంచ్ సంస్థ‌ల జాబితాను సిద్ధం చేసిన రెరా

ప్రీలాంచుల్లో ప్లాట్లు, ఫ్లాట్ల‌ను విక్ర‌యించే మోస‌పూరిత రియ‌ల్ సంస్థ‌ల జాబితాను తెలంగాణ రెరా అథారిటీ సిద్ధం చేసింది. న‌గ‌రానికి నాలుగువైపులా దాదాపు ప‌ద్నాలుగు రియ‌ల్ సంస్థ‌లు వేసిన వెంచ‌ర్ల‌లో ప్లాట్ల‌ను కొనుగోలు చేయ‌కూడ‌ద‌ని ప్ర‌జ‌ల‌ను అప్ర‌మ‌త్తం చేస్తోంది. ఈ మేర‌కు రెండో జాబితాను విడుద‌ల చేయ‌డానికి రెరా అథారిటీ సిద్ధ‌మైంద‌ని స‌మాచారం. భువ‌నతేజ ఇన్‌ఫ్రా, ఆర్‌జే హోమ్స్‌, ఏవీ ఇన్‌ఫ్రాకాన్ వంటి సంస్థ‌ల‌కు ఇదివ‌ర‌కే రెరా అథారిటీ నోటీసుల‌ను పంపించింది. కానీ, ఆయా కంపెనీలు ఇంత‌వ‌ర‌కూ స్పందించ‌లేదు. రెరా నోటీసును బేఖాత‌రు చేస్తూ.. ప్లాట్లు, ఫ్లాట్ల‌ను విక్ర‌యించిన ఈ సంస్థ‌ల‌పై ప్రాజెక్టు విలువ‌లో ప‌ది శాతం జ‌రిమానాను విధించ‌డానికి రెరా అథారిటీ స‌మాయ‌త్తం అవుతుంద‌ని స‌మాచారం.

విజ‌య‌వాడ హైవే మీద గ‌ల చౌటుప్ప‌ల్‌, సూర్యాపేట్‌.. ముంబై హైవే మీద గ‌ల సంగారెడ్డి, స‌దాశివ‌పేట్‌, నారాయ‌ణ్‌ఖేడ్‌.. బెంగ‌ళూరు జాతీయ ర‌హ‌దారి మీద గ‌ల షాద్ న‌గ‌ర్‌, జ‌డ్చ‌ర్ల‌.. సాగ‌ర్ రోడ్డు, శ్రీశైలం హైవే మీద గ‌ల ప‌లు ప్రాంతాలు.. వ‌రంగ‌ల్ హైవే మీద ఆలేరు, యాదాద్రి వంటి ప్రాంతాల్లో.. ఈ ప‌ద్నాలుగు సంస్థ‌లు రెరా అనుమ‌తి లేకుండా ప్లాట్లు, ఫ్లాట్లను విక్ర‌యిస్తున్నార‌ని తెలుసుకున్న రెరా అథారిటీ.. ఆయా వెంచ‌ర్ల‌లో ఎవ‌రూ కొన‌కూడ‌ద‌ని కోరుతోంది. రెరా అనుమ‌తి తీసుకున్న వెంచ‌ర్ల‌లోనే ప్లాట్లు, ఫ్లాట్ల‌ను కొనుగోలు చేయాల‌ని సూచిస్తోంది.

కొన్ని రియ‌ల్ సంస్థ‌లు ఏం చేస్తున్నాయంటే.. 10 లేదా 20 ఎక‌రాలకు అనుమ‌తి తీసుకుని.. వంద‌ల ఎక‌రాల్లో ప్లాట్ల‌ను అమ్ముతున్నాయి. అదేమిట‌ని కొనుగోలుదారులు ప్ర‌శ్నిస్తే.. మొత్తం వెంచ‌ర్‌కు రెరా అనుమ‌తి ల‌భించింద‌ని ప్ర‌చారం చేస్తున్నాయ‌నే విష‌యం రెరా దృష్టికొచ్చింది. ఇందుకు చౌటుప్ప‌ల్‌లోని జీ స్క్వేర్ ప్ర‌త్య‌క్ష ఉదాహ‌ర‌ణ అని చెప్పొచ్చు. చెన్నైకి చెందిన జీ స్క్వేర్ అనే సంస్థ చౌటుప్ప‌ల్‌లో 1200 ఎక‌రాల్లో ఎపిటోమ్ అనే ప్రాజెక్టును అభివృద్ధి చేస్తోంది. ఈ క్ర‌మంలో 200 ఎక‌రాల్లో ప్లాట్ల‌ను అమ్మ‌డానికే రెరా అనుమ‌తిని తీసుకుంది. కానీ, మొత్తం ప‌న్నెండు వందల ఎక‌రాల‌కు రెరా అనుమ‌తి ల‌భించిన‌ట్లు ప్ర‌చారం చేస్తూ.. ప్ర‌జ‌ల‌ను మోసం చేస్తోంది. ఈ అంశంలో రికార్డుల‌ను ప‌రిశీలించ‌గా.. కేవ‌లం 200 ఎక‌రాల‌కే అనుమ‌తి తీసుకున్న‌ట్లు రెరా గుర్తించింది. అందుకే, ఈ సంస్థ వ‌ద్ద ప్లాట్లు కొనేవారు ఏయే ఫేజులో కొంటున్నార‌నే విష‌యాన్ని తెలుసుకున్నాకే సొమ్ము చెల్లించాల‌ని రెరా చెబుతోంది. స‌ర్వే నెంబ‌ర్ 493లోని దేవుల‌మ్మ న‌గ‌ర్ గ్రామంతో పాటు మొత్తం వెయ్యి ఎక‌రాల్లో వేసిన ప్లాట్ల‌ను కొన‌వ‌ద్ద‌ని చెబుతోంది.

ప్రెస్టీజ్ ఎస్టేట్స్‌పై రూ.2 కోట్ల జ‌రిమానా?

బెంగ‌ళూరుకు చెందిన ప్రెస్టీజ్ ఎస్టేట్స్ అనే సంస్థ కోకాపేట్లో ప్రీలాంచ్‌లో ఫ్లాట్ల‌ను విక్ర‌యించిన విష‌యం రెరా దృష్టికి వ‌చ్చింది. ఇటీవ‌ల ఈ కంపెనీ రెరా కోసం ద‌ర‌ఖాస్తు చేసుకుంది. అయితే, ప్రీలాంచ్‌లో ఫ్లాట్ల‌ను విక్రయించిన విష‌యం గుర్తించిన రెరా అథారిటీ.. ప్ర‌తి ఫ్లాటు మీద రూ.25 వేలు జ‌రిమానా విధించ‌డానికి స‌మాయ‌త్తం అవుతుంది. ఈ సంస్థ ఎంత‌లేద‌న్నా 800 ఫ్లాట్ల‌ను ప్రీలాంచ్‌లో విక్ర‌యించిన విష‌యం తెలిసిందే. ఈ మొత్తాన్ని లెక్కిస్తే.. ఎంత‌లేద‌న్నా ప్రెస్టీజ్ ఎస్టేట్స్‌పై సుమారు రూ.2 కోట్లు జ‌రిమానా విధించే అవ‌కాశాలు క‌నిపిస్తున్నాయి.

ఈ సంస్థ‌ల వద్ద ప్లాట్లు కొన‌వ‌ద్దు!

రెరా చ‌ట్టం 2016 సెక్ష‌న్ 3(1), 4 (1) ప్ర‌కారం.. ఎలాంటి అనుమ‌తుల్లేవ‌ని రెరా అథారిటీ తెలియ‌జేసింది. రెరా చ‌ట్టంలోని సెక్ష‌న్‌ 3(1) ప్ర‌కారం.. రెరా అనుమ‌తి లేకుండా ఎలాంటి ప్లాటు కానీ ఫ్లాటు కానీ విక్ర‌యించ‌కూడ‌ద‌ని స్ప‌ష్టం చేసింది. ఇక నుంచి రెరా అనుమ‌తి లేని వెంచ‌ర్ల‌లో ప్లాట్లు, ఫ్లాట్లు, విల్లాలు విక్ర‌యించ‌కూడ‌ద‌ని.. అలా అమ్మే వాటిలో కొనుగోలు చేయ‌కూడ‌ద‌ని తెలియ‌జేసింది. ఈ క్ర‌మంలో తెలంగాణ రాష్ట్రంలో ప్లాట్లు, ఫ్లాట్లు, విల్లాలు, వాణిజ్య స‌ముదాయాల్లో కొనుగోలు చేసేవారు.. వాటికి రెరా అనుమ‌తి ఉందా? లేదా? అనే విష‌యాన్ని రెరా వెబ్‌సైటులో తెలుసుకున్నాకే ముంద‌డుగు వేయాల‌ని సూచించింది. ఇందుకోసం రెరా వెబ్‌సైటు ((https://rerait.telangana.gov.in /SearchList /Search)ను చూడాల‌ని కోరింది.

న‌గ‌రానికి చెందిన యోషితా ఇన్‌ఫ్రా స‌దాశివ‌పేట్ టౌన్లో వేసిన వెంచ‌ర్‌లో ప్లాట్ల‌ను కొన‌వ‌ద్ద‌ని రెరా చెబుతోంది. అదే విధంగా, యూనిక్ ఇన్‌ఫ్రా ప్రాజెక్ట్స్ పిగ్లీపూర్ గ్రామం, 17/1 స‌ర్వే నెంబ‌ర్ వేసిన వెంచ‌ర్‌, సూర్యాపేట్ వ‌ద్ద ఎలైట్ సాయి డెవ‌ల‌ప‌ర్స్ వంటి వెంచ‌ర్ల‌లో ప్లాట్లు కొన‌కూడ‌ద‌ని అంటోంది. రెరా సిద్ధం చేసిన జాబితా ప్ర‌కారం.. ఇంకా ఏయే వెంచ‌ర్ల‌లో ప్లాట్లు కొన‌కూడ‌దంటే..
అలేఖ్య ఇన్‌ఫ్రా డెవ‌ల‌ప‌ర్స్ సంగారెడ్డి
కేవీఎస్ హోమ్స్, పిల్ల‌ల‌మ‌ర్రి గ్రామం, సూర్యాపేట్ స‌ర్వే నెం. 174
జీ స్క్వేర్‌, దేవుల‌మ్మ గ్రామం, స‌ర్వే నెం 493.
అలేఖ్య ఎస్టేట్స్‌, పెద్దాపూర్‌, స‌ర్వే నెంబ‌ర్లు 497/బి, 498 and 499/బి, సంగారెడ్డి
అక్షితా ఇన్‌ఫ్రా, సూర్యాపేట్‌, విజ‌య‌వాడ హైవే
విశ్వ డెవ‌ల‌ప‌ర్స్‌, రాజ‌పూర్, స‌ర్వే నెం. 50/పి, 140/పి, 141/పి
101 ఎక‌ర్స్‌, ఫార్మా ఎలైట్‌, అమేజ్‌, ఫార్మా నేచ‌ర్ సిటీ నందిప‌ర్తి, యాచారం
భువ‌నతేజ ఇన్‌ఫ్రా, ఆర్‌జే హోమ్స్‌, ఏవీ ఇన్‌ఫ్రాకాన్ వెంచర్లు, అపార్టుమెంట్లు