అద్దెపై జీఎస్టీ బాదుడు

అద్దెలపై జీఎస్టీ విధించే విషయంలో కేంద్ర ప్రభుత్వం కీలక నిర్ణయం తీసుకుంది. రెసిడెన్షియల్ ప్రాపర్టీలను వాణిజ్య అవసరాల కోసం ఇస్తే.. దాని ద్వారా వచ్చే అద్దెపై 18 శాతం జీఎస్టీ చెల్లించాల్సిందేనని స్పష్టంచేసింది. ఈ మేరకు ఇటీవల జరిగిన 47వ జీఎస్టీ కౌన్సిల్ సమావేశంలో నిర్ణయం తీసుకున్నారు.

రెసిడెన్షియల్ ప్రాపర్టీలను నివాస అవసరాల కోసం ఇచ్చనట్టయితే జీఎస్టీ వర్తించదు. కానీ వాణిజ్య అవసరాల కోసం ఇస్తే మాత్రం ఆ అద్దెపై 18 శాతం జీఎస్టీ చెల్లించక తప్పదు. కంపెనీ ఆ భవనాన్ని నివాస అవసరాల కోసం అద్దెకు తీసుకున్నప్పటకీ, 18 శాతం జీఎస్టీ చెల్లించాలి. జూలై 18 నుంచి ఇది అమల్లోకి వచ్చింది. అద్దెకు తీసుకున్న ప్లాట్ లో నివసిస్తున్న, రిజిస్టర్డ్ జీఎస్టీ నంబర్ లేని ఏ వ్యక్తి అయినా 18 శాతం జీఎస్టీ చెల్లించాల్సిన అవసరం లేదు. అయితే, జీఎస్టీ నంబర్ ఉన్న కంపెనీ వ్యక్తులకు లీజుకు ఇస్తే అద్దెదారు జీఎస్టీ చెల్లించాలి. రివర్స్ మెకానిజం కింద ప్రభుత్వ క్రెడిట్ కు లీజుదారు ఈ జీఎస్టీ చెల్లించాల్సి ఉంటుంది.