అంతా ఊహించిన‌ట్లే జ‌రిగింది. ఎప్ప‌టిలాగే కేంద్ర ఆర్థిక‌మంత్రి.. నిర్మాణ రంగానికి మొండిచేయి చూపెట్టింది. 2024 మధ్యంతర బడ్జెట్ రియల్ రంగానికి ఉప‌యోగ‌ప‌డే ఎలాంటి భారీ ప్ర‌క‌ట‌న‌ల్ని చేయ‌లేదు. గ‌త ప‌దేళ్ల‌లో.. కేంద్ర ప్ర‌భుత్వం నిర్మాణ రంగానికి ప్ర‌త్య‌క్షంగా ప్ర‌యోజ‌నం చేకూర్చే ప్ర‌క‌ట‌న‌లేవీ పెద్ద‌గా చేయ‌లేద‌నే విష‌యాన్ని గ‌మ‌నించాలి. ఈ పార్టీ అధికారంలోకి వ‌చ్చిన కొత్త‌లో.. అంద‌రికీ గృహాలు అని అట్ట‌హాసంగా ఆరంభించినా.. ఆ త‌ర్వాత ఆ ప‌థ‌కం కాస్త నీరుగారిపోయింది. జీడీపీలో వ్య‌వ‌సాయం త‌ర్వాత అధిక శాతం వాటా క‌లిగి ఉన్న నిర్మాణ రంగానికి పరిశ్రమ హోదాను మంజూరు చేయాల‌ని ప‌దేళ్ల నుంచి కోరుతున్నా.. నేటికీ క‌నిక‌రించ‌లేదు. భ‌విష్య‌త్తులో ప్ర‌క‌టిస్తుంద‌నే ఆశ కూడా లేదు. అయినా, నిర్మాణ సంఘాలు ఎంతో ఆశ‌తో ఎదురు చూస్తున్నాయి. న‌గ‌రాలు, ప‌ట్ట‌ణాల్లో మౌలిక స‌దుపాయాల్ని అభివృద్ధి చేసేందుకు ప‌లు నిర్ణ‌యాల్ని మాత్రం తీసుకున్నారు.
మధ్యతరగతికి గృహనిర్మాణం – అద్దె ఇళ్లు లేదా మురికివాడల్లో నివ‌సించేవారిలో అర్హులైన వారికి సొంత ఇల్లు కొనుక్కోవ‌డానికి లేదా నిర్మించుకోవ‌డానికి ఒక ప్ర‌త్యేక ప‌థ‌కాన్ని ఆరంభిస్తామ‌ని ఆర్థిక మంత్రి ప్ర‌క‌టించారు. దీని వ‌ల్ల స్టీలు, సిమెంటు, నిర్మాణ‌సామ‌గ్రి ప‌రిశ్ర‌మ‌ల‌కు ప్ర‌యోజ‌నం క‌లుగుతుంది.
This website uses cookies.