మియాపూర్‌లో కొత్త ఫ్లాట్లు క‌ష్ట‌మేనా?

15 వేల ఫ్లాట్ల నిర్మాణం
వీటికి తోడుగా కొత్త ప్రాజెక్టుల ఆరంభం
ఏటా 3-4 వేల ఫ్లాట్ల అమ్మ‌కం
అమ్మ‌కానికి క‌నీసం ఎనిమిదేళ్లు

మియాపూర్లో ఫ్లాట్ల నిర్మాణం జోరందుకుంది. గతంలో కంటే ఈమధ్య అధిక స్థాయిలో కొత్త ఫ్లాట్లు ఆరంభమయ్యాయి. మియాపూర్ చౌరస్తా నుంచి గండిమైస‌మ్మ దాకా క‌నీసం ప‌దిహేను వేల ఫ్లాట్ల నిర్మాణం జ‌రుగుతోంది. ఇందులో చిన్న అపార్టుమెంట్ల‌తో పాటు న‌ల‌భై ఐదు అంత‌స్తుల ఆకాశ‌హ‌ర్మ్యాలూ ఉన్నాయి. మియాపూర్లోని ఎస్ఎంఆర్ విన‌య్ సిటీ చుట్టుప‌క్క‌ల క్యాండియ‌ర్ 40, ప్రైమార్క్‌, ఆర్‌వీ నిర్మాణ్‌, వ‌ర్టెక్స్‌, నైలా, సియా క‌న్‌స్ట్ర‌క్ష‌న్స్, క్యాండియర్ ట్విన్స్ వంటి సంస్థ‌లే దాదాపు ఐదు వేల ఫ్లాట్ల‌ను నిర్మిస్తున్నాయి. కోకా కోలా ఫ్యాక్టరీ చౌరస్తా నుంచి బాచుప‌ల్లి చౌర‌స్తా వ‌ర‌కూ గ‌ల మెయిన్ రోడ్డుతో పాటు అక్క‌డి చుట్టుప‌క్క‌ల ప్రాంతాల్లో మ‌రో ఐదు వేల ఫ్లాట్ల నిర్మాణం జ‌రుగుతోంది. అమీన్‌పూర్‌, బాచుప‌ల్లి చౌర‌స్తా నుంచి మ‌ల్లంపేట్‌, ప్ర‌గ‌తిన‌గ‌ర్‌, బౌరంపేట్ వంటి ప్రాంతాల నుంచి గండి మైస‌మ్మ చుట్టుప‌క్క‌ల ప్రాంతాల‌ను లెక్కిస్తే.. మ‌రో ఐదు వేల ఫ్లాట్ల నిర్మాణం జ‌రుగుతోంది. మ‌రి, ఇన్నిన్ని ఫ్లాట్లు ఎప్ప‌టికీ అమ్ముడ‌వుతాయి?

సాధార‌ణంగా మియాపూర్, ప్ర‌గ‌తిన‌గ‌ర్‌, బాచుప‌ల్లి, మ‌ల్లంపేట్‌, బౌరంపేట్, నిజాంపేట్‌ వంటి ప్రాంతాల్లో ఏడాదికి సుమారు మూడు నుంచి నాలుగు వేల ఫ్లాట్లు దాకా అమ్ముడ‌వుతాయి. తాజాగా, రెరా అనుమ‌తి తీసుకున్న ప్రాజెక్టుల‌ను ప‌రిగ‌ణ‌న‌లోకి తీసుకుంటేనే.. సుమారు ప‌దిహేను వేల ఫ్లాట్ల నిర్మాణం జరుగుతోంది. ఇవ‌న్నీ పూర్త‌వ్వాలంటే ఎంత‌లేద‌న్నా నాలుగైదేళ్లు పడుతుంది. ఈలోపు ఏటా కొత్త నిర్మాణాలు ఆరంభం అవుతాయి. వాటినీ ప‌రిగ‌ణ‌న‌లోకి తీసుకుంటే.. ఈ ఫ్లాట్ల అమ్మ‌కాల‌కు ఎంత‌లేద‌న్నా ఐదారేళ్లు ప‌ట్టే అవ‌కాశ‌ముంది.

మియాపూర్ చుట్టుప‌క్క‌ల ప్రాంతాల్లో ప్ర‌ప్ర‌థ‌మంగా ముప్ప‌య్ నుంచి న‌ల‌భై అంత‌స్తుల ఎత్తు దాకా ఫ్లాట్ల‌ను నిర్మిస్తున్నారు. ఇందులో ఎంత‌మంది స‌కాలంలో పూర్తి చేస్తారు? మ‌రెంత మంది ఎన్ని సంవ‌త్స‌రాలు క‌డ‌తారో తెలియాలంటే కొంత‌కాలం వేచి చూడాల్సిందే. మ‌రి, ఫ్లాట్ల‌ను నాణ్య‌త‌గా క‌డ‌తారా? లేదా? అనే సందేహం ప్రతిఒక్క‌ర్ని ప‌ట్టిపీడిస్తోంది. అందులో స‌దుపాయాలు, సౌక‌ర్యాలెలా ఉంటాయి? కొనుగోలుదారులు వాటిలోకి ప్ర‌వేశించిన త‌ర్వాతే సంతోషిస్తారా? లేక కొత్త స‌మ‌స్య‌ల్ని ఎదుర్కొంటారా? లిఫ్టులు ఎంత వేగంగా ప‌ని చేస్తాయి? త‌క్కువ విస్తీర్ణంలో ఎక్కువ ఫ్లాట్ల‌ను క‌డుతున్నారు కాబ‌ట్టి.. ప్రాజెక్టు ఆవ‌ర‌ణ‌లో వాహ‌నాల ర‌ద్దీ ఎలా ఉంటుంది? పై అంత‌స్తుల వ‌ర‌కూ మంచినీటి స‌ర‌ఫ‌రా నిరంత‌రాయంగా జ‌రుగుతుందా? ఇలాంటి అంశాల్ని స్వ‌యంగా గ‌మ‌నించాకే.. అందులో నివ‌సించాలా? వ‌ద్దా? అని బ‌య్య‌ర్లు ఒక నిర్ణ‌యానికొచ్చే అవ‌కాశ‌ముంది. కాక‌పోతే, ఒక‌ట్రెండు ప్రాజెక్టులు పూర్త‌య్యాకే అస‌లు విష‌యం అర్థ‌మ‌వుతుంది. ఆత‌ర్వాతే మిగ‌తా ఆకాశ‌హ‌ర్మ్యాల డిమాండ్ ఆధార‌ప‌డుతుంద‌ని గుర్తుంచుకోండి.