బడ్జెట్లో బ‌య్య‌ర్ల‌ను క‌రుణిస్తారా?

దేశ ఆర్థికాభివృద్ధిలో రియల్ రంగానిది కీలకపాత్ర. స్థిరాస్తి రంగం ఎంత బాగుంటే దేశ ఆర్థిక పరిస్థితి అంత బాగుంటుంది. కరోనా తర్వాత నుంచి ఇటీవల కాలం వరకు ప్రపంచవ్యాప్తంగా పరిణామాలు ఎలా ఉన్నప్పటికీ, భారత రియల్ రంగం దూసుకెళ్లింది. ఈ నేపథ్యంలో రాబోయే కేంద్ర బడ్జెట్ ఎలా ఉంటుంద‌నేది సర్వత్రా ఆసక్తికరంగా మారింది. రియల్ ప్లేయర్లు, గృహ కొనుగోలుదారులకు కేంద్ర ఆర్థిక మంత్రి శుభవార్త చెబుతారా లేదా అనే చర్చ జరుగుతోంది. ప్రస్తుత పరిస్థితుల్లో రియల్ రంగానికి ఊతమిచ్చే నిర్ణయాలు రాబోయే కేంద్ర బడ్జెట్ లో ఉండొచ్చని నిపుణులు భావిస్తున్నారు.

ఆర్థిక మంత్రి నిర్మలా సీతారామన్ సమర్పించనున్న కేంద్ర బడ్జెట్ 2025-26లో.. డెవలపర్లపై జీఎస్టీ భారాన్న తగ్గించడం, క్రెడిట్ లింక్డ్ సబ్సిడీ స్కీమ్ పునరుద్ధరణ, గృహ రుణ వడ్డీలో సవరణ, ఎఫ్‌డీఐ నిబంధనల సడలింపులపై రియల్ ఎస్టేట్ రంగం దృష్టి సారిస్తోంది. 2024లో భారత స్థిరాస్తి రంగం ఎన్నడూ లేనంత బలంగా సాగింది. గతేడాది భారత రియల్ మార్కెట్ గణనీయమైన వృద్ధి సాధించింది. రెసిడెన్షియల్ సెగ్మెంట్, ముఖ్యంగా లగ్జరీ హౌసింగ్, అంతిమ-వినియోగదారులు, కొనుగోలుదారుల దృష్టిని ఆకర్షిస్తూ మెరుగైన పనితీరును కనబరిచింది. దేశ ఆర్థిక వ్యవస్థకు దన్నుగా నిలిచే రియల్ ఎస్టేట్ రంగానికి మరింత ఊతమిచ్చే చర్యలను కేంద్రం చేపట్టే అవకాశం ఉందని నిపుణులు అభిప్రాయపడుతున్నారు.

రానున్న బడ్జెట్‌లో రియల్‌ ఎస్టేట్‌ రంగాన్ని వృద్ధి దిశగా పయనింపజేసే అవకాశం ఉంటుందని సుమ‌ధుర గ్రూప్ ఛైర్మ‌న్ జి.మ‌ధుసూద‌న్ తెలిపారు. “గృహ కొనుగోలుదారులకు మెరుగైన పన్ను ప్రయోజనాల్ని ఇవ్వాల‌ని రియల్ రంగం కోరుతోంది. ప్రత్యేకించి హౌసింగ్ డిమాండ్‌ను పెంచడానికి గృహ రుణ వడ్డీకి అధిక మినహాయింపు పరిమితి ఇవ్వాలి. నిర్మాణంలో ఉన్న ప్రాపర్టీలపై జీఎస్టీ రేట్ల హేతుబద్ధీకరణతోపాటు గ్రీన్, సస్టెయినబుల్ రియల్ ఎస్టేట్ ప్రాజెక్టులకు ప్రోత్సాహకాలు ఇస్తే ప్రయోజనం ఉంటుంది. అంతేకాకుండా డెవలపర్లకు లిక్విడిటీని పెంపొందించే విధానాలు తీసుకురావడం, ఈజ్ ఆఫ్ డూయింగ్ బిజినెస్‌ను ప్రోత్సహించాలి’ అని ఆయన పేర్కొన్నారు.