న‌గ‌రంలో ఎప్ప‌టికైనా ఓ సొంతిల్లు ఉండాల‌నేది చాలామంది కోరిక. అందుకే, క‌ష్ట‌ప‌డి సంపాదించి పొదుపు చేసిన సొమ్ముతో కొనాల‌ని భావిస్తారు. తన జీవితకాలంలో పెట్టే అతిపెద్ద పెట్టుబడి ఇంటి పైనే. ఎక్కువ మొత్తంలో తీసుకునే రుణం కూడా గృహం కోసమే. ఇక ఇంటిమీద పెట్టే పెట్టుబడి ఒకసారితోనే అయిపోదు. కాలానుగుణంగా మార్పులు, విస్తరణ తదితరాల రూపంలో ఎప్పటికప్పుడు ఖర్చు పెట్టక తప్పదు. అదే సమయంలో ఇంటి కోసం సగటు వేతనజీవి లేదా సాధారణ వ్యాపారి ఒకేసారి అంత భారీ మొత్తం వెచ్చించే అవకాశాలు ఉండవు. ఇలాంటివారి కోసమే పలు బ్యాంకులు దీర్ఘకాలిక గృహరుణాలు ఆఫర్ చేస్తున్నాయి. అసలు ఎన్ని రకాల గృహరుణాలు అందుబాటులో ఉన్నాయి? ఎవరికి ఏ ప్రాతిపదికన అవి లభిస్తాయి వంటి వివరాలు ఓ లుక్కేద్దామా..?
గృహరుణం ఏ ప్రాతిపదికన ఇస్తారంటే…
1. మీ వేతనం లేదా మీ వ్యాపారం వార్షిక టర్నోవర్
2. మీ వయసు
3. ప్రస్తుతం మీరు చేసిన రుణాలు
4. మీ క్రెడిట్ స్కోర్
5. మీరు కొనాలనుకునే ప్రాపర్టీ. అలాగే దాని విలువలో 20శాతం చెల్లించే స్తోమత మీరు కలిగి ఉన్నారా అనే విషయం.
6. ప్రాంతం. ప్రాపర్టీ అనుమతులు తదితర అంశాలు
ఫిక్స్ డ్ వడ్డీనా.. ఫ్లోటింగా?
గృహరుణం తీసుకునేటప్పుడే ఎలాంటి వడ్డీ రేటు కావాలనేది ఎంపిక చేసుకోవాల్సి ఉంటుంది. ఫిక్స్ డ్ వడ్డీ రేటా లేక ఫ్లోటింగ్ వడ్డీ రేటా అనేది రుణం తీసుకునే సమయంలోనే నిర్ధారించుకోవాలి. మీ ఆర్థిక స్థితిగతులు, అవసరాలు ఇతరత్రా అన్ని అంశాలనూ బేరీజు వేసుకుని దీనిపై నిర్ణయం తీసుకోవాల్సి ఉంటుంది. ఈ రెండు వడ్డీ రేట్ల మధ్య తేడాలేంటో చూద్దాం..
ఫ్లోటింగ్ వడ్డీ రేటును ఎప్పుడు ఎంపిక చేసుకోవాలంటే..
– వడ్డీ రేట్లు తగ్గే అవకాశం ఉందని మీరు భావిస్తున్నప్పుడు
– వడ్డీ రేట్లు ఎలా మారతాయనే విషయంపై సరైన అంచనా లేనప్పుడు
– సమీప భవిష్యత్తులో మీ వడ్డీరేట్లపై కాస్త పొదుపు చేసుకోవాలని అనుకున్నప్పుడు
ఫిక్స్ డ్ వడ్డీ రేటును ఎప్పుడు ఎంచుకోవాలంటే..
– మీరు ఎంచుకున్న ఈఎంఐ చెల్లించడంలో ఎలాంటి సమస్యా లేనప్పుడు
– వడ్డీ రేట్లు పెరుగుతాయని మీరు భావిస్తున్నప్పుడు
– వడ్డీ రేట్లు తగ్గినా, పెరిగినా మీరు ఒకే వడ్డీ రేటు చెల్లించాలని అనుకున్నప్పుడు
ఒకవేళ ఈ రెండింటిలో ఏది ఎంచుకోవాలనే విషయంలో సరైన నిర్ణయానికి రాలేకపోతే, కాంబినేషన్ లోన్ ఎంచుకోవచ్చు. ఇందులో ఫిక్స్ డ్ వడ్డీ, ఫ్లోటింగ్ వడ్డీ రెండూ ఉంటాయి. నిర్దేశిత రుసుం చెల్లించి ఫిక్స్ డ్ నుంచి ఫ్లోటింగ్ వడ్డీకి, ఫ్లోటింగ్ నుంచి ఫిక్స్ డ్ రేటుకు మారొచ్చు. ప్రస్తుతం గతంలో ఎన్నడూ లేనంత తక్కువ వడ్డీ ఉన్న నేపథ్యంలో ఫిక్స్ డ్ వడ్డీ రేటు ఎంచుకోవచం ఉత్తమం. అయితే, ఈ విషయంలో మీదే తుది నిర్ణయం.
