అక్రమ నిర్మాణాల విషయంలో బాంబే హైకోర్టు కన్నెర్ర జేసింది. అలాంటి అక్రమ నిర్మాణాలకు బాధ్యులైన వ్యక్తులను గుర్తించాలని ఆదేశించింది. నవీ ముంబైలో ఫ్లోర్ స్పేస్ ఇండెక్స్ (ఎఫ్ఎస్ఐ) కుంభకోణం జరిగిందంటూ దాఖలైన పిటిషన్ పై విచారణ సందర్భంగా కోర్టు ఈ మేరకు వ్యాఖ్యలు చేసింది. ముంబైలోని పలు ప్రాంతాల్లో సిడ్కో కేటాయించిన ప్లాట్లలో అక్రమాలు జరిగాయని.. దాదాపు 10 వేలకు పైగా ఇళ్లను అక్రమంగా నిర్మించారని ఓ విద్యార్థి పిటిషన్ దాఖలు చేశారు.
కేవలం గ్రౌండ్ ఫ్లోర్ వరకే అనుమతి ఉండగా.. ఏకంగా 90 శాతం మంది రెండేసి అంతస్తుల చొప్పున నిర్మించారని, ఇది పూర్తిగా అక్రమమని అందులో పేర్కొన్నారు. ఈ ఉల్లంఘనలను నవీ ముంబై మున్సిపల్ కార్పొరేషన్ అధికారుల దృష్టికి తీసుకెళ్లినా పట్టించుకోలేదని వివరించారు. వాదనలు విన్న ధర్మాసనం.. తొలుత అక్రమ నిర్మాణాలకు బాధ్యులైనవారిని గుర్తించాలని ఆదేశించింది.
