రియల్ ఎస్టేట్ మార్కెట్ ఎప్పుడూ లాభదాయకంగానే ఉంటుంది. కోవిడ్ మహమ్మారి తర్వాత ఈ రంగం భలే పుంజుకుంది. ఈ నేపథ్యంలో కొత్త సంవత్సరంలో రియల్ రంగంలో పెట్టుబడులు పెట్టాలనుకునేవారు ఏం జాగ్రత్తలు తీసుకోవాలి?
రియల్ ఎస్టేట్ మార్కెట్ శరవేగంగా పుంజుకున్నప్పటికీ, ఈ రంగంలో పెట్టుబడులు చక్కని ప్రగతి సాధించాలంటే కొంతకాలం వేచి చూడక తప్పదు. అయితే, మీ సొంత ప్రాపర్టీని అద్దెకు ఇవ్వడం ద్వారా వేగంగా ఆదాయం పొందొచ్చు. ఈ కారణంగా రెసిడెన్షియల్ రియల్ ఎస్టేట్ పెట్టుబడి కంటే వాణిజ్య రియల్ ఎస్టేట్ పెట్టుబడి మరింత ప్రయోజనకరంగా ఉంటుంది. అయితే, ఏ రకమైన పెట్టబడి విషయంలోనైనా ముందుగా సంబంధిత నిపుణులను సంప్రదించాలి. ‘ఏదైనా సంస్థ యొక్క విశ్వసనీయతను తెలుసుకోవాలంటే సోషల్ నెట్ వర్క్ లలో వెతకడం, ఆ సంస్థ వెబ్ సైట్ ను చూడటం, సదరు కంపెనీ ప్రస్తుతం చేస్తున్న, గతంలో పూర్తి చేసిన ప్రాజెక్టులను పరిశీలించడం, ప్రత్యేక కన్సల్టెంట్ లేదా ప్రాజెక్టు మేనేజర్ తో నేరుగా మాట్లాడటం, స్నేహితులు లేదా పరిచయస్తుల నుంచి ఆ సంస్థ వివరాలు తెలుసుకోవడం ఉత్తమ మార్గాలు’ అని నిపుణులు చెబుతున్నారు.
ఇక గ్రీన్ బిల్డింగ్ పర్యావరణ ప్రయోజనాలపై ప్రజలకు అవగాహన పెరగడంతో దేశంలో వాటికి ఆదరణ పెరిగింది. ఈ నేపథ్యంలో ఇంటిని కొనుగోలు చేసేటప్పుడు లేదా అద్దెకు తీసుకునేటప్పుడు ధర కంటే ఈ అంశాన్ని ఎక్కువగా పరిగణించాలి. ఇంధన వినియోగం, భవనం యొక్క జీవితకాల ఖర్చులు, నిర్వహణ ఖర్చులను కూడా పెట్టుబడిదారులు పరిగణనలోకి తీసుకుంటారని.. అందువల్ల బహుళ ప్రయోజనాలు అందించే గ్రీన్ బిల్డింగ్ ప్రాజెక్టుల్లో పెట్టుబడులు పెట్టడం లాభదాయకమైన నిర్ణయమని చెప్పొచ్చు.
