పిరమల్ చేతికి డీహెచ్ఎఫ్ఎల్

తీవ్రమైన ఆర్థిక సమస్యలతో సతమతమవుతున్న దివాన్ హౌసింగ్ ఫైనాన్స్ లిమిటెడ్ (డీహెచ్ఎఫ్ఎల్) కొనుగోలు ప్రక్రియ పూర్తయినట్టు పిరమల్ ఎంటర్ ప్రైజెస్ వెల్లడించింది. రుణపరిష్కార ప్రణాళికలో భాగంగా రివర్స్ మెర్జర్ ద్వారా డీహెచ్ఎఫ్ఎల్ విలీనం పూర్తిచేసినట్టు వెల్లడించింది. ఈ మేరకు రూ.34,250 కోట్లను రుణదాతలకు చెల్లించామని తెలిపింది. ఫిక్స్ డ్ డిపాజిట్ దారులతోపాటు రుణదాతలు మొత్తం రూ.38వేలు కోట్ల మేర సొమ్మును పొందారని వివరించింది. ఈ విలీనం గతనెల 30 నుంచి అమల్లోకి వచ్చిందని పేర్కొంది. రివర్జ్ మెర్జర్ నేపథ్యంలో పిరమల్ క్యాపిటల్ హౌసింగ్ ఫైనాన్స్ లిమిటెడ్ (పీసీహెచ్ఎఫ్ఎల్) అంటే.. పిరమల్ ఎంటర్ ప్రైజెస్ లిమిటెడ్ (పీఈఎల్) వాటాదారులలకు డీహెచ్ఎఫ్ఎల్ ఈక్విటీ షేర్లను జారీచేస్తుంది. నాలుగువారాల్లో ఈ ప్రక్రియ పూర్తిచేయనుంది. అంటే డీహెచ్ఎఫ్ఎల్ లోని వందశాతం వాటా పిరమల్ ఎంటర్ ప్రైజెస్ వశమవుతుంది. తమ గ్రూప్ ఆర్థిక సేవల కార్యకలాపాలను మరింత విస్తరించడానికి ఈ విలీనం దోహదపడుతుందని పీఈఎల్ ఓ ప్రకటనలో పేర్కొంది. డీహెచ్ఎఫ్ఎల్ భారీగా రుణాలిచ్చి దాదాపు రూ.90వేల కోట్ల మేర నష్టాలు చవిచూసింది. ఈ నేపథ్యంలో ఈ ఏడాది జనవరిలో పిరమల్ గ్రూప్ ఓ రుణపరిష్కార ప్రణాళికతో ముందుకొచ్చింది. డీహెచ్ఎఫ్ఎల్ కు రుణాలిచ్చినవారిలో 94 శాతం మంది దానికి అనుకూలంగా ఓటేశారు. తాజాగా ఈ విలీన ప్రక్రియ పూర్తయింది.