హైదరాబాద్ లో వచ్చే ఏడాది ఫిబ్రవరి 11న జరగబోయే తొమ్మిదో ఫార్ములా-ఈ రేసు కోసం నెక్లెస్ రోడ్డు సిద్ధమవుతోంది. హుస్సేన్ సాగర్ చుట్టూ ప్రతిపాదిత ట్రాక్ కు సంబంధించిన పనులను హెచ్ఎండీఏ మొదలుపెట్టింది. సాగర్ చుట్టూ ఉన్న రోడ్డును బ్లాక్ టాపింగ్ తో రేసింగ్ కు అనువుగా మార్చనుంది. నెల రోజుల్లోగా ఈ పనులు పూర్తి చేయనుంది. అనంతరం ఈ రోడ్డు రేసింగ్ కు అనువుగా ఉందో లేదో రోడ్డు భద్రతా ప్రమాణాల పరీక్ష నిర్వహిస్తుంది. ఫార్ములా-ఈ ట్రాక్ పొడవు 2.80 కిలోమీటర్లు. మొత్తం 17 మలుపులు ఉంటాయి. ఈ రేసును చూడటానికి వీక్షకుల కోసం ప్రత్యేక ఏర్పాట్లు కూడా చేస్తున్నారు. రేస్ సర్క్యూట్ ఎన్టీఆర్ గార్డెన్ ఎదురుగా మొదలై.. ఎన్టీఆర్ మార్గ్, ప్రసాద్ ఐమ్యాక్స్ రోడ్డు ద్వారా ప్రయాణించి అక్కడ లూప్ తీసుకుని తిరిగి ఎన్టీఆర్ గార్డెన్ వద్దకు చేరుకుంటుంది.
