- ఆర్‌వోఆర్ చట్టం ప్రకారం..
- గ్రామంలోని ప్రతి భూమిని నమోదు చేయాల్సిందే
- ధరణిలో కొంద‌రివే నమోదు ఎందుకు?
- లక్షల ఎక‌రాల భూములు మాయం
- భౌతిక, ఎలక్ట్రానిక్ రూపంలో ఎంట్రీల్ని సేక‌రించాలి
పీఎస్ఎన్ ప్ర‌సాద్‌,ప్రముఖ న్యాయ‌వాది
అసమర్థ, లోపభూయిష్ట మరియు రాజ్యాంగ విరుద్ధంగా రూపొందించిన ధరణి పోర్ట‌ల్‌ని చూస్తే విస్మ‌య‌మేస్తోంది. ముఖ్య‌మంత్రి కేసీఆర్ క‌న్న క‌ల‌లేమిటి? ఈ అధికారులు చేస్తున్న‌దేమిటి? తెలంగాణ రాష్ట్రంలో ప్రతి ఒక్క రైతు తమ భూముల వివ‌రాల‌ను సులువుగా పొందాలి. న‌యా పైసా లంచం ఇవ్వ‌కుండా పట్టా తీసుకోవాలి. రైతులు రాజుల్లా తమ డాక్యుమెంట్ల‌ను తీసుకోవాల‌న్న‌దే క‌దా సీఎం ముఖ్య ఉద్దేశ్యం. మ‌రి, ఆయ‌న ఆలోచ‌న‌ల‌కు విరుద్ధంగా.. రైతుల‌కు శాపంగా మారే విధంగా ఈ ధరణి పోర్ట‌ల్‌ని ఎందుకు రూపొందించింది? గ‌త కొంత‌కాలం నుంచి తెలంగాణ రైతులు తీవ్రంగా ఇబ్బందులు ఎదుర్కొంటుంటే.. వాటిని ప‌రిష్క‌రించ‌కుండా.. ఈ ఉన్న‌తాధికారులు ఎందుకు కాల‌యాప‌న చేస్తున్నారు? ధరణి పోర్టల్లో ఎదుర‌య్యే స‌మ‌స్య‌ల‌కు శాశ్వత ప‌రిష్కారం ఎందుకు చూపెట్ట‌డం లేదు?
తెలంగాణ రికార్డ్ ఆఫ్ రైట్స్ ఇన్ ల్యాండ్ మరియు పట్టాదారు పాస్ బుక్స్‌ చట్టం 2020 ప్రకారం ఈ ధరణి పోర్ట‌ల్‌ని రూపొందించారు. కానీ, ఈ చట్టాన్ని పూర్తిగా ఉల్లంఘించి ధ‌ర‌ణిని రూపొందించార‌ని స్ప‌ష్టంగా అర్థ‌మ‌వుతోంది. ఎందుకంటే, ఈ చట్టంలోని సెక్షన్ 3 ప్రకారం.. రాష్ట్రంలోని ప్రతి గ్రామంలోని అన్ని భూములపై హక్కుల రికార్డును నిర్దేశించిన విధంగా మరియు పద్ధతిలో కేంద్రీకృత నిల్వలో డిజిటల్‌గా తయారు చేసి నిర్వహించాలి. అంతేకాదు, భూములకు పట్టాదారులుగా ఉన్న వ్యక్తులందరి పేర్లు, ప్రతి పట్టాదార్ సర్వే నంబర్లు మరియు విస్తీర్ణాలు, నిర్దేశించబడిన ఇతర వివరాలు వంటివి హక్కుల రికార్డు కింద పొందుప‌ర్చి ఉండాలి. కానీ, ఇవేవీ ధరణిలో నమోదు చేయ‌లేదు.
త‌క్ష‌ణ‌మే ఇలా చేయాలి..
ధరణి పోర్టల్లో ప్రతి ఒక్క అంశాన్ని అశాస్త్రీయంగా, చట్టవిరుద్ధంగా తీర్చిదిద్దారు. ఇది నేరుగా ఆర్‌వోఆర్ చట్టం 2020ని ఉల్లంఘిస్తోంది. ఈ ప్రాథ‌మిక అంశాన్ని ఉప‌సంఘం పెద్ద‌గా ప‌ట్టించుకున్న దాఖ‌లాలు క‌నిపించ‌ట్లేదు. కాబ‌ట్టి, ఉప‌సంఘం త‌క్ష‌ణ‌మే ఏం చేయాలంటే.. కొత్త ఆర్‌వోఆర్ చట్టంలోని సెక్షన్ 3లోని నిబంధనల్ని అనుస‌రించాలి. ఎందుకంటే, 1971 చట్టం ప్ర‌కార‌మే ఆర్‌వోఆర్ రూపొందించారు. దాన్ని ఆధారంగా ప్ర‌స్తుతం కొత్త చట్టాన్ని సిద్ధం చేశారు. అలాంట‌ప్పుడు, 1971 చట్టం ప్రకారం తయారు చేసిన అన్ని భౌతిక ఎంట్రీలు మరియు ఎలక్ట్రానిక్ ఎంట్రీలను మొదట ధరణి పోర్టల్లోకి ఒకేలా తీసుకు వ‌చ్చేలా క‌స‌ర‌త్తు జ‌ర‌గాలి. ఇంకా ఏం చేయాలంటే..
ఆస్తి హ‌క్కు ఉల్లంఘ‌న (బాక్స్‌)
చట్టం ప్రకారం, ధరణిలో వివరాలన్నింటినీ నమోదు చేయకుండా ఉండే అధికారం రాష్ట్ర ప్రభుత్వానికి లేదా కలెక్టర్ లేదా ఎమ్మార్వో వంటి ఏ అధికారికి లేదు! నమోదు చేయబడిన వివరాల యొక్క ఖచ్చితత్వం లేదా వేరే విషయం పూర్తిగా వేరే విషయం. రికార్డింగ్ చేయని చర్య చాలా తీవ్రమైనది మరియు ప్రమాదకరమైనది.”రూల్ ఆఫ్ లా” అనే గొప్ప సూత్రానికి అవమానం. ఇది భారత రాజ్యాంగంలోని ఆర్టికల్ 300లో పొందుపరిచిన ఆస్తి హక్కును ఉల్లంఘిస్తుంది.
