ఏపీలో కొత్త పట్టణాభివృద్ధి సంస్థ

ఆంధ్రప్రదేశ్ ప్రభుత్వం కొత్తగా పట్టణాభివృద్ధి సంస్థను ఏర్పాటు చేసింది. 2008లో ఏర్పాటైన విశాఖపట్నం- కాకినాడ పెట్రోలియం కెమికల్స్, పెట్రో కెమికల్స్ ఇన్వెస్ట్మెంట్ రీజియన్ (వీకే- పీసీపీఐఆర్) స్థానంలో కొత్తగా వీకే పీసీపీఐఆర్ యూడీఏని ఏర్పాటు చేసింది. ఈ మేరకు గెజిట్ నోటిఫికేషన్ జారీ చేసింది. పాత రీజియన్లో ఏడు రెవెన్యూ మండలాలు, 32 గ్రామాలుండగా.. కొత్తగా ఏర్పాటైన పట్టణాభివృద్ధి సంస్థలో పది రెవెన్యూ మండలాలు, 97 గ్రామాలున్నాయి. వైకాపా కార్యకర్త చొక్కాకుల లక్ష్మీని చైర్ పర్సన్గా, విశాఖ మెట్రోపాలిటన్ రీజియన్ డెవలప్మెంట్ అథారిటీ కమిషనర్ను శాశ్వత సీఈవోగా నియమించింది. ఛైర్ పర్సన్ పదవీకాలం రెండేళ్లు కాగా.. విశాఖపట్నం, తూర్పు గోదావరి జిల్లా కలెక్టర్లతో సహా పది మందిని సభ్యులుగా నియమించింది. విశాఖపట్నం జిల్లా కరాడ గ్రామం నుంచి తూర్పు గోదావరి జిల్లాలోని వాకలపూడి వరకూ 640 చదరపు కిలోమీటర్ల ప్రాంతం దీన్ని పరిధిలోకి రానుంది.