రెడీ టు ఆక్యుపై.. అండ‌ర్ క‌న్‌స్ట్ర‌క్ష‌న్‌.. రెండింట్లో ఏ ఇల్లు కొంటే ఉత్త‌మం?

సొంతిల్లు.. ఇది ప్రతి ఒక్కరి కల. సొంతింటి కలను నిజం చేసుకునేందుకు అంతా ఉవ్విళ్లూరుతుంటారు. కలల ఇంటి కోసం కష్టపడి పైసా పైసా కూడబెడతారు. అలా ఇళ్లు కొనేటప్పుడు ఎన్నో సందేహాలు. నిర్మాణంలో ఉన్న ఇల్లు కొనాలా.. లేక అప్పటికే నిర్మాణం పూర్త‌యిన‌ ఇంటిని కొనుక్కోవాలా అన్నది చాలా మందిలో మెదిలే ప్రశ్న. గృహ ప్రవేశానికి సిద్దంగా ఉన్న ఇంటిని కొనడం వల్ల లాభనష్టాలేంటీ.. నిర్మాణంలో ఉన్న గృహాన్ని కొనడంతో కలిగే ప్రయోజనాలేంటీ.. రియల్ రంగ నిపుణులు ఏమంటున్నారో తెలుసుకుందాం..

సొంతిల్లు అందరి కల. సామాన్యుడి నుంచి మొదలు ధనవంతుల వరకు తమ కలల సౌధమైన సొంతింటిని తమ బడ్జెట్ మేరకు.. వారి అభిరుచి ప్రకారం ఉండాలని అనుకుంటారు. సామాన్య, మధ్యతరగతి వారైతే.. దాదాపు జీవితంలో ఒక్కసారి మాత్రమే సొంతం చేసుకునే సొంతింటి విషయంలో ఎన్నో ఆలోచనలు ఉంటాయి. తమకు అందుబాటు ధరలో, నచ్చిన ప్రాంతంలో ఇంటిని సొంతం చేసుకోవాలని ప్రతి ఒక్కరూ కోరుకుంటారు. అయితే సొంతిల్లు తీసుకునే విషయంలో చాలా మందికి అనేక సందేహాలు ఉంటాయి. అందులో ప్రధానంగా చెప్పుకోవాల్సింది నిర్మాణంలో ఉన్న ఇంటిని కొనుగోలు చేయాలా.. లేక అప్పటికే నిర్మాణం పూర్త‌యిన‌ ఇంటిని కొనుక్కోవాలా.. అని చాలా మంది ఆలోచిస్తుంటారు. ప్రస్తుత పరిస్థితుల్లో కొనుగోలుదారులకు ఏది అనుకూలం అన్నది చాలా మందిలో మెదిలే ప్రశ్న.