ఘ‌న‌మైన అభివృద్ధికి.. గ‌జ్వేల్‌..

శరవేగంగా అభివృద్ది చెందుతున్న హైదరాబాద్ మహా నగరానికి రీజినల్ రింగ్ రోడ్డు మరో మణిహారం కాబోతోంది. తెలంగాణ రాష్ట్ర అభివృద్ధిలో ట్రిపుల్ ఆర్ గేమ్ ఛేంజర్ కానుందని రియల్ ఎస్టేట్‌ వర్గాల అంచనా వేస్తున్నాయి. మొత్తం 347 కిలో మీటర్ల పొడవున 4 వరుసలతో నిర్మించే ఈ గ్రీన్ ఎక్స్‌ప్రెస్ వేను రెండు భాగాలుగా నిర్మించనున్నారు. ట్రిపుల్ ఆర్ నిర్మాణానికి సంబందించిన భూసేకరణ పనులు ఇప్పటికే మొదలవ్వగా, టెండర్లు ఆహ్వానించేందుకు సిద్దమవుతోంది తెలంగాణ ప్రభుత్వం. హైదరాబాద్ నగరం చుట్టూ ఇప్పటికే ఔటర్ రింగ్ రోడ్డు ఉండగా.. దీని వెలుపల రీజినల్ రింగ్ రోడ్‌‌ నిర్మాణం జరగనుంది. తెలంగాణలోని పలు జిల్లాలను కలుపుతూ రీజినల్ రింగ్ రోడ్డు ఏర్పాటు అవుతోంది. రీజినల్ రింగ్ రోడ్‌ సూపర్ గేమ్ ఛేంజర్ అవుతుందని, ఈ ప్రాజెక్ట్ వస్తే రాష్ట్ర స్వరూపం మారిపోతుందని తెలంగాణ ప్రభుత్వం భావిస్తోంది. ఐదేళ్లలో రీజినల్ రింగ్ రోడ్ నిర్మాణం పూర్తి చేయాలని లక్ష్యంగా పెట్టుకుంది రేవంత్ సర్కార్. ఈ క్రమంలో రీజినల్ రింగ్ రోడ్డు ప్రాజెక్టులో భాగంగా గజ్వేల్ దగ్గర నిర్మించే భారీ జంక్షన్ తో అక్కడ రియల్ ఎస్టేట్ రంగానికి మంచి ఫ్యూచర్ ఉంటుందని అంచనా వేస్తున్నారు.

ప్రతిష్టాత్మకమైన రీజినల్ రింగ్ రోడ్డు ప్రాజెక్టులో మొత్తం 12 ఇంటర్ చేంజర్స్ నిర్మించేలా డిజైన్ చేశారు. జాతీయ, రాష్ట్ర రహదారులతో కనెక్ట్ అయ్యే ఈ 12 ప్రాంతాల్లో భారీ జంక్షన్స్ ఏర్పాటు కానున్నాయి. అంతర్జాతీయ స్థాయిలో నిర్మాణం జరుపుకోబోయే ఈ భారీ ఇంటర్ చేంజర్స్ పరిసర ప్రాంతాల్లో రియల్ ఎస్టేట్ గ్రోత్ కు మంచి అవకాశం ఉంటుందని భావిస్తున్నారు. రీజినల్ రింగ్ రోడ్డు ఇంటర్ చేంజర్స్ లో కరీంనగర్ రహదారిపై తూఫ్రాన్ సమీపంలో వచ్చే జంక్షన్ గురించి ప్రధానంగా చెప్పుకోవాలి. గజ్వేల్ దగ్గర నిర్మించబోయే ఇంటర్ చేంజర్ చుట్టు పక్కల భారీగా మౌలిక వసతులు ఏర్పాటు కానున్నాయని అధికారులు చెబుతున్నారు. ఇప్పటికే అల్వాల్ నుంచి మొదలు శామీర్ పేట్ వరకు డెవలప్ అవ్వగా.. ఇప్పుడు రీజినల్ రింగ్ రోడ్డు, గజ్వేల్ దగ్గర వచ్చే భారీ జంక్షన్ తో ఈ ప్రాంతం మరింత అభివృద్ది చెందనుందని అంచనా వేస్తున్నారు.

ఇప్పటికే రీజినల్ రింగ్ రోడ్డు కు సంబంధించి కరీంనగర్ రహదారిపై గజ్వేల్ సమీపంలో మార్కింగ్ చేయగా.. అందుకు సంబంధించిన భూసేకరణ ప్రక్రియ తుది దశకు చేరుకుంది. ఈ క్రమంలో గజ్వేల్ చుట్టుపక్కల ప్రాంతాలు భవిష్యత్తులో ఊహించలేనంతగా మారిపోనున్నాయని రియాల్టీ వర్గాలు అంటున్నాయి. ట్రిపుల్ ఆర్ మార్కింగ్ తో గజ్వేల్ సమీప ప్రాంతాల్లో రియల్ ఎస్టేట్ వ్యాపారం కొంతమేర ఊపందుకుంది. శామీర్ పేట్- గజ్వేల్ మధ్య మొన్నటి వరకు హైవే ఫెసింగ్ తో ఎకరం 1.2 కోట్ల రూపాయల నుంచి 1.5 కోట్ల రూపాయలు ఉండగా.. ఇప్పుడు రీజినల్ రింగ్ రోడ్డు జంక్షన్ ఏర్పాటు కానుండటంతో ఇక్కడ ఎకరం 1.4 కోట్ల నుంచి 2.2 కోట్లకు పెరిగిందని చెబుతున్నారు. జాతీయ రహదారి నుంచి కాస్త లోపలికి 2 నుంచి 5 కిలోమీటర్ల రేడియస్ లో ఎకరం కోటి రూపాయల నుంచి 1.3 కోట్ల మేర ధరలున్నాయి. ఇక్కడ రీజినల్ రింగ్ రోడ్డు పనులు మొదలైతే భూముల ధరలు మరింత పెరిగే అవకాశం ఉందని అంచనా వేస్తున్నారు.

ట్రిపుల్ ఆర్ జంక్షన్ ఏర్పాటయ్యే గజ్వేల్ సమీపంలోని గుండంపల్లి, సంగుపల్లి, క్యాసారం, ప్రజ్ఞాపూర్ వరకు ఇప్పటికే రియల్ వెంచర్లు వెలిశాయి. ఇక ఇప్పుడు రీజినల్ రింగ్ రోడ్డు ఇంటర్ చేంజర్ ఏర్పాటవుతుండటంతో భారీగా వెంచర్లు వేసేందుకు రియాల్ ఎస్టేట్ సంస్థలు ఏర్పాట్లు చేస్తున్నాయి. ప్రస్తుతం ప్రజ్ఞాపూర్ లో డీటీసీపీ లేఅవుట్ లో రియాల్టీ ప్రాజెక్టు, ప్రాంతాన్ని బట్టి చదరపు గజం 15 వేల రూపాయల నుంచి 28 వేల రూపాయల వరకు ధరలున్నాయి. ఇక గజ్వేల్ సమీప పరిసర ప్రాంతాల్లో చదరపు గజం 16 వేల రూపాయల నుంచి 30 వేల రూపాయల వరకు ప్లాట్ల ధరలున్నాయి. గజ్వేల్ సమీపంలోని సంగుపల్లిలో భారీ స్థాయిలో ఇప్పటికే ఓపెన్ ప్లాటు వెంచర్లు ఉండగా.. చదరపు గజం 14 వేల రూపాయల నుంచి మొదలు 22 వేల రూపాయల వరకు ప్లాట్స్ అందుబాటులో ఉన్నాయి. ఆ తరువాత గుండంపల్లిలో డీటీసీపీ లేఆవుట్లలో చదరపు గజం 12 వేల రూపాయల నుంచి 18 వేల రూపాయల వరకు ధరలున్నాయి.

గజ్వేల్ పరిసర ప్రాంతంలో విద్యా సంస్థలు, పలు పరిశ్రమలు ఉన్నాయి. ఇక ఇప్పుడు రీజినల్ రింగ్ రోడ్డు చుట్టూ శాటిలైట్ టౌన్ షిప్ లను ఏర్పాటు చేసేలా తెలంగాణ ప్రభుత్వం ప్రణాళికలు సిద్దం చేసింది. అంతే కాకుండా ఈ ప్రాంతాల్లో ఇండస్ట్రియల్ క్లస్టర్లు, లాజిస్టిక్స్ పార్కులు ఏర్పాటుకానున్నాయి. హైదరాబాద్ శివారు ప్రాంతాల్లోని ఫార్మా కంపెనీలు రీజినల్ రింగ్ రోడ్డుకు చేరువగా తమ ల్యాబ్‌లు, ఫ్యాక్టరీలను తరలించనుండటంతో ఇక్కడ మరిన్ని ఉపాధి అవకాశాలు రానున్నాయి. ఈ క్రమంలోనే రానున్న రోజుల్లో గజ్వేల్ జంక్షన్ కనివినీ ఎరగుని రీతిలో అభివృద్ది చెందనుందని రియాల్టీ వర్గాలు అంచనా వేస్తున్నాయి. రీజినల్ రింగ్ రోడ్డుతో ఇటు హైదరాబాద్ కు, అటు ఇతర ప్రాంతాలకు కనెక్టివిటీ పెరగనుండటంతో సామాన్య, మధ్య తరగతి వాళ్లు గజ్వేల్ పరిసర ప్రాంతంలో స్థిర నివాసం ఏర్పాటు చేసుకునేందుకు మొగ్గుచూపుతున్నారు. దీంతో క్రమంగా షామీర్ పేట్ నుంచి గజ్వేల్ వరకు నిర్మాణ ప్రాజెక్టులతో పాటు భారీ స్థాయిలో వెంచర్లకు అవకాశం ఉంటుందని రియాల్టీ వర్గాలు చెబుతున్నాయి.