హైదరాబాద్ లో అల్ట్రా ప్రీమియం అపార్ట్ మెంట్స్

అవును హైదరాబాద్ నిర్మాణరంగంలో రోజు రోజుకు ట్రెండ్ మారుతోంది. ప్రస్తుతం గ్రేటర్ సిటీలో అల్ట్రా ప్రీమియం గేటెడ్ కమ్యునిటీల నిర్మాణం జోరుగా సాగుతోంది. కొనుగోలుదారుల డిమాండ్ మేరకు కనీవినీ ఎరుగని లగ్జరీ సౌకర్యాలతో వీటిని నిర్మిస్తున్నారు బిల్డర్లు.

ఇరవై ఏళ్ల క్రితం అపార్ట్ మెంట్స్ అంటే ఆశ్చర్యంతో చూసినవారున్నారు. క్రమ క్రమంగా అపార్ట్ మెంట్స్ పోయి ఆ స్థానంలో గేటెడ్ కమ్యునిటీలు వచ్చేశాయి. హైదరాబాద్ లో ఒక్కో గేటెడ్ కమ్యునిటీ వెయ్యి ఫ్లాట్స్ నుంచి 3వేల ఫ్లాట్స్ వరకు ఉంటున్నాయి. ఐతే అంతకు మించి కావాలంటున్నారు భాగ్యనగర వాసులు. ఈ నేపధ్యంలో ఇంటి కొనుగోలుదారుల అభిరుచుల మేరకు హైదారాబాద్ లో అల్ట్రా ప్రీమియం కమ్యునిటీల ట్రేండ్ మొదలైంది. ప్రధానంగా హైదరాబాద్ వెస్ట్ లో ఐటీ హబ్ పరిసర ప్రాంతాల్లో అల్ట్రా ప్రీమియం ప్రాజెక్టులు భారీగా నిర్మాణం జరుపుకుంటున్నాయి. ఇప్పటికే ఒకటి రెండు నిర్మాణ సంస్థలు ఇలాంటి లగ్జరీ అపార్ట్ మెంట్స్ ను నిర్మించగా మరో 20 వరకు అల్ట్రా ప్రీమియం ప్రాజెక్టులు నిర్మాణంలో ఉన్నాయి.

అల్ట్రా ప్రీమియం ఫ్లాట్స్ ఒక్కోటి కనీసం 5 వేల చదరపు అడుగుల విస్తీర్ణంలో నిర్మిస్తున్నారు. ఆ తరువాత 10 వేల నుంచి 16 వేల చదరపు అడుగుల విస్తీర్ణం వరకు కూడా ఉంటున్నాయి. ఎకరం వంద కోట్ల రూపాయల ధర పలికిన కోకాపేటలో అధికంగా ఈ తరహాలో అపార్ట్‌ మెంట్స్ నిర్మాణం జరపుకుంటున్నాయి. కోకాపేట్ తో పాటు, ఐటీ కారిడార్‌ లోని నార్సింగి, గండిపేట్, నానక్ రాంగూడ లో సైతం అల్ట్రా ప్రీమియం అపార్ట్ మెంట్స్ నిర్మాణాలను చేపట్టాయి పేరున్న నిర్మాణ సంస్థలు. ఇప్పటికే రెండు నుంచి మూడు వేల చదరపు అడుగుల విస్తీర్ణంలోని అపార్ట్ మెంట్స్ లో నివాసం ఉంటున్న వారు కుటుంబ అవసరాల కోసం మరింత విలాసవంతమైన ఇళ్ల వైపు చూస్తున్నారు. ఇప్పటి వరకు ఇలాంటి వారంతా విల్లాలవైపు మొగ్గు చూపేవారు. ఐతే విల్లా అనే సరికి నగరానికి కాస్త దూరం వెళ్లాల్సి వస్తుండటంతో, సిటీలోనే విల్లా సదుపాయాలు ఉండే అల్ట్రా ప్రీమియం అపార్ట్ మెంట్స్ వైపు మొగ్గుచూపుతున్నారు.

ఇక హైదరాబాద్‌లో అల్ట్రా ప్రీమియం అపార్ట్ మెంట్స్ ధరలు విల్లాలను మించి ఉంటున్నాయి. అల్ట్రా ప్రీమియం ప్రాజెక్టుల్లో చదరపు అడుగు 12 వేల రూపాయల నుంచి గరిష్టంగా 20 వేల రూపాయల వరకు ఉంటున్నాయి. అంటే 5 వేల చదరపు అడుగుల విస్తీర్ణంలో ఉన్న ప్లాట్ ధర 6 కోట్ల నుంచి 10 కోట్ల రూపాయలన్నమాట. అదే 15 వేల చదరపు అడుగుల విస్తీర్ణం ఉన్న ఫ్లాట్ ధర ఏకంగా 18 కోట్ల నుంచి 25 కోట్ల రూపాయల వరకు ఉన్నాయి. ఇలా అల్ట్రా ప్రీమియం అపార్ట్ మెంట్స్ ను రాజకీయ-సినీరంగ ప్రముఖులు, వ్యాపారులు, ఐటీ, ఫార్మ్, బ్యాంకింగ్ రంగంలోని ఉన్నత ఉద్యోగులు, వైద్యులు, ఎన్ఆర్ఐలు వీటిని కొనుగోలు చేస్తున్నారని నిర్మాణదారులు చెబుతున్నారు.

ఇక అల్ట్రా ప్రీమియం అపార్ట్ మెంట్స్ లో కొందరు విశాలమైన నివాసంలో ఉండేందుకు కొనుగోలు చేస్తుండగా, మరికొందరు పెట్టుబడి కోణంలో కొంటున్నారని రియల్టీ వర్గాలు చెబుతున్నాయి. భద్రత, గ్రీనరీ, లగ్జరీ సౌకర్యాలు, వైద్య సదుపాయలు, ఆధ్యాత్మిక కార్యక్రమాలతో పాటు మరెన్నో అంశాలను దృష్టిలోపెట్టుకుని అల్ట్రా ప్రీమియం అపార్ట్ మెంట్స్ వైపు మొగ్గుచూపుతున్నారు కొనుగోలుదారులు. అంతే కాదు ఇలాంటి అపార్ట్ మెంట్స్ లో నివాసం ఉంటే సొసైటీలో ప్రిస్టీజ్ గా భావిస్తున్నారు చాలా మంది. ఐటీ కారిడార్‌ లోని ప్రాజెక్టులైతే రెంట్స్ సైతం భారీగా వస్తుండటంతో ఐటీ సంస్థలు సైతం వారి అవసరాల రీత్యా ఫ్లాట్లను బుక్‌ చేస్తున్నాయి. వీటికి మార్కెట్లో డిమాండ్ ఉండటంతో బడా నిర్మాణ సంస్థలు అల్ట్రా ప్రీమియం అపార్ట్ మెంట్స్ ను నిర్మించేందుకు ఉత్సాహం చూపుతున్నాయి. సుమారు 40 నుంచి అత్యధికంగా 58 అంతస్తుల వరకు ఈ అపార్ట్ మెంట్స్ అంతర్జాతీయ అర్కిటెక్ట్స్ తో డిజైన్ చేసి మరీ నిర్మిస్తున్నారు.