హైదరాబాద్ రీజినల్ రింగు రోడ్డు ప్రాజెక్టు ఉత్తర భాగం పనులకు రెండు నెలల క్రితం టెండర్లు పిలిచారు. అయితే ఈ పనులపై తాజాగా కీలక అప్డేట్ వచ్చింది. ఉత్తర భాగం టెండర్లు తెరవడానికి మరికొంత సమయం పట్టే అవకాశం ఉందని అధికార వర్గాలు వెల్లడిస్తున్నారు. 161 కి.మీ మేర నిర్మించనున్న ఉత్తర భాగం భూసేకరణపై ఇంకా స్పష్టత రాకపోవడం, ఫారెస్ట్ డిపార్ట్‌మెంట్ నుంచి అనుమతుల ప్రక్రియ వేగవంతం కాకపోవడంతో ఈ పనులు ఆలస్యం కావొచ్చునని తెలుస్తోంది. రీజినల్ రింగు రోడ్డు ఉత్తర భాగాన్ని గ్రీన్‌ఫీల్డ్‌ రీజనల్‌ ఎక్స్‌ప్రెస్‌వేగా నిర్మించాలని కేంద్రం నిర్ణయించింది. సంగారెడ్డి జిల్లా గిర్మాపూర్‌ నుంచి యాదాద్రి జిల్లాలోని తంగడ్‌పల్లి వరకు మొత్తం 161.518 కిలోమీటర్ల మేర పనులు చేపట్టేందుకు రంగం సిద్ధమైంది. ఉత్తర భాగం మొత్తం వ్యయం అంచనా 7,104.06 కోట్లుగా కేంద్రం నిర్ణయించింది.
ఈ రహదారిని నాలుగు వరుసలుగా నిర్మించడానికి నేషనల్ హైవేస్ అథారిటీ ఆఫ్ ఇండియా గత యేడాది డిసెంబరు 27న టెండర్లు ఆహ్వానించింది. ఉత్తర భాగం పనుల బిడ్‌ల దాఖలుకు ఫిబ్రవరి 14న తుది గడువుగా నిర్ణయించింది. నోటిఫికేషన్‌ ప్రకారం ఈనెల 17నే టెండర్లు తెరవాల్సి ఉంది. అయితే జాతీయ రహదారుల సంస్థ ఈ ప్రక్రియను తాజాగా వాయిదా వేసింది. టెండర్లు తెరిచేందుకు మరో రెండు వారాల సమయం తీసుకోనున్నట్లు కేంద్ర ప్రభుత్వ వర్గాలు చెబుతున్నాయి. రీజినల్ రింగు రోడ్డు ఉత్తరభాగం పనుల కోసం మొత్తం 1,940 హెక్టార్ల భూసేకరణ చేయాల్సి ఉంది. ఇందులో దాదాపు 94 శాతం భూసేకరణ పూర్తయింది.
రీజినల్ రింగ్ రోడ్డు ఉత్తర భాగానికి సంబందించిన భూసేకరణలో మిగిలిన భూములు న్యాయ వివాదాల్లో చిక్కుకున్నట్లు అధికారులు గుర్తించారు. ఇవి కాకుండా భూములు కోల్పోయిన రైతులకు సైతం పూర్తిస్థాయిలో నష్ట పరిహారం ఇవ్వాల్సి ఉంది. మెదక్, సిద్దిపేట, యాదాద్రి భువనగిరి జిల్లాల పరిధిలో మొత్తం 72.35 హెక్టార్లలో పనులు మెుదలుపెట్టడానికి ఫారెస్ట్ డిపార్ట్‌మెంట్ నుంచి అనుమతులు వచ్చాయి. ఈ భూములకు సంబంధించి అటవీశాఖకు పరిహారం చెల్లించాల్సి ఉంది. దాంతో పాటుగా ప్రత్యామ్నాయ భూమి కేటాయింపు, మొక్కల పెంపకం వంటి ప్రక్రియను కూడా చేపట్టాల్సి ఉందని కేంద్ర ప్రభుత్వం ఆలస్యంగా గుర్తించింది. అందుకే ఇవన్నీ పూర్తయిన తర్వాతే టెండర్లు తెరిచే అవకాశం ఉన్నట్లు అధికారిక వర్గాల సమాచారం.
