ఈక్విటీ విషయంలో జాగ్రత్త

రియల్ ఎస్టేట్ లేదా ఏ వ్యాపారమైనా సరే ఈక్విటీ విషయంలో చాలా జాగ్రత్తగా ఉండాలని శోభా రియల్టీ ఫౌండర్ పీఎన్సీ మీనన్ పేర్కొన్నారు. అబుదాబీలో క్రెడాయ్ నేషనల్ నిర్వహించిన నాట్ కాన్-2022 సదస్సులో ఆయన మాట్లాడారు. వివరాలు ఆయన మాటల్లోనే..

‘నా ప్రయాణం గురించి చెప్పాలంటే 47 ఏళ్లు వెనక్కి వెళ్లాలి. నేను గత 47 ఏళ్లుగా గల్ఫ్ లో ఉంటున్నాను. నేను ఇక్కడకు రాక ముందు ఓసారి కొచ్చిలోని ఓ హోటల్ లాబీలో సులేమాన్ అనే వ్యక్తిని కలిశాను. ఆయన ఓ చేపల పడవను కొనడానికి కేరళ వచ్చారు. అదే నా గల్ఫ్ ప్రయాణానికి నాంది అయింది. వాస్తవానికి ఇండియా బయటక వెళ్లి ఏం చేయాలనేదానిపై నాకు అప్పుడు ఎలాంటి ప్రణాళికలూ లేవు. తొలుత పాస్ పోర్టు కోసం దరఖాస్తు చేసిన తర్వాత రెండు మూడు నెలల్లో మస్కట్ వచ్చాను. విమానంలో మస్కట్ వస్తున్నప్పుడు ఎడారి చూశాను. చాలా బాధ అనిపించింది. తొలి నాళ్లలో నా ప్రయాణం చాలా కష్టంగా సాగింది. అవన్నీ చెప్తే సమయం సరిపోదు. కాబట్టి నేరుగా వివరాల్లోకి వద్దాం.

దుబాయ్ లో పోటీని ఎలా తట్టుకున్నామంటే?

ఎమారస్ చాలా పెద్ద బ్రాండ్. వారేం చేస్తున్నారు? మేం ఏం చేయాలి అని ఆలోచించాం. ఆ మేరకు బెంచ్ మార్క్ నిర్దేశించుకున్నాం. వారిలో 30 శాతం చేరుకున్నా చాలని భావించాం. శోభ కంపెనీ సామర్థ్యం వేరు. నేను దుబాయ్ లో రియల్ ఎస్టేట్ వ్యాపారం ప్రారంభించినప్పుడు చాలా దారుణమైన సమయం. తొలుత నేను 183 ఎకరాల భూమి కొనుగోలు చేశా. అయితే, ఆ సమయంలో అక్కడ భూమి కొనడం చాలా తప్పుడు నిర్ణయమనే కామెంట్లు వచ్చాయి. అయితే, నా దృష్టిలో దుబాయ్ వేరు. ఈ దేశాన్ని ఎవరూ టచ్ చేయలేరు. ఇక్కడ అన్నీ బాగుంటాయి. పరిపాలన, అధికార యంత్రాంగం అన్నీ అద్భుతంగా ఉంటాయి. ఎవరైనా సరే దుబాయ్ లో తమ వ్యాపారాన్ని ప్రారంభించాలనుకుంటే నేను వారిని సంతోషంగా ఆహ్వానిస్తున్నాను. ఇక్కడ ఎలాంటి అవినీతి లేదు.. ఎలాంటి సమస్యలూ ఉండవు. ఎవరికి ఒక్క రూపాయి చెల్లించాల్సిన అవసరం లేదు. ఎవరైనా సరే దుబాయ్ వచ్చి వారి వ్యాపారాన్ని విస్తరించుకోవచ్చు.