విశాఖపట్నం.. ఏపీలో కీలక నగరం. ప్రభుత్వం ఎగ్జిక్యూటివ్ కేపిటల్ గా ప్రకటించిన ప్రాంతం. మరి అక్కడ రియల్ ముఖచిత్రం ఎలా ఉంది? ఎలాంటి అనువైన వాతావరణం ఉందో చూద్దామా? పారిశ్రామిక, ఐటీ రంగం, కాస్మోపాలిటన్ సంస్కృతి కారణంగా ఉత్తరాంధ్ర ప్రముఖ రెసిడెన్షియల్ మార్కెట్ గా విశాఖ ప్రసిద్ధికెక్కింది. అక్కడ అపార్ట్ మెంట్ సగటున చదరపు అడుగుకు రూ.4,950గా ఉంది.
ఎంవీపీ కాలనీ, సిరిపురం, సీతమ్మధార, పెద్ద వాల్తేరు ప్రాంతాలు ప్రైమ్ ఏరియా కేటగిరీలోకి వస్తాయి. ఈ ప్రాంతాల్లో మెరుగైన సౌకర్యాలు ఉండటం, భూ లభ్యత తక్కువగా ఉండటంతో ధరలు చాలా ఎక్కువ.
గాజువాక, దువ్వాడ, అచ్యుతాపురం, పర్వాడ తదితర ప్రాంతాలు సౌత్ వెస్ట్ పరిధిలో ఉంటాయి. ప్రధానంగా ఇది పారిశ్రామిక ప్రాంతం. ప్రస్తుతం గాజువాక ప్రముఖ రియల్ ఎస్టేట్ ప్రాంతంగా మారుతోంది.
రుషికొండ, ఎందాడ, మధురవాడ ప్రాంతాలు నగరం ఉత్తర పరిధిలోకి వస్తాయి. ఐటీ హబ్ కు కేంద్రంగా ఉండటంతో రియల్ ఎస్టేట్ మార్కెట్ లో కీలక పాత్ర పోషిస్తోంది. అన్ని ప్రధాన రెసిడెన్షియల్ గేటెడ్ కమ్యూనిటీలు ఇక్కడ వస్తున్నాయి.
ఎన్ఏడీ, గోపాలపురం, వేపగుంట ప్రాంతాలు పశ్చిమ పరిధిలో ఉంటాయి. పెందుర్తితో ఎన్ఏడీని అనుసంధానం చేసే ప్రధాన రహదారి వెంబడి అభివృద్ధి జరుగుతోంది. సరసమైన ధర నుంచి మధ్య తరహా ఇళ్ల సెగ్మెంట్ కు ఈ ప్రాంతం ప్రసిద్ధి చెందింది.
వాణిజ్యపరంగా చూస్తే సిరిపురం, వాల్తేర్ రోడ్డు, సంపత్ వినాయక టెంపుల్ రోడ్, మద్దెలపాలెం వంటివి ప్రైమ్ ఆఫీస్ మార్కెట్ ప్రాంతాలు. ఇక్కడ 2.2 మిలియన్ చదరపు అడుగుల గ్రేడ్ ఏ ఆఫీస్ స్టాక్ ఉంది. ఇందులో ఎక్కువ భాగం మధురవాడ, రుషికొండ ఐటీ సెజ్ లతో కనెక్ట్ అయి ఉంటుంది. ప్రైమ్ ఆఫీస్ మార్కెట్ లో లీజు చదరపు అడుగుకు రూ.50 నుంచి రూ.55 వరకు ఉంది. రుషికొండ, మధురవాడ ప్రాంతాల్లో చదరపు అడుగుకు రూ.40 నుంచి రూ.50 వరకు ఉంది.
రిటైల్ బ్రాండ్లకు ఆకర్షణీయమైన గమ్యస్థానంగా విశాఖ అవతరించింది. వీఐపీ రోడ్, వాల్తేర్ రోడ్, సంపత్ వినాయక్ రోడ్, సిరిపురం వంటివి ప్రముఖ హై స్ట్రీట్ ప్రాంతాలు. స్టార్ బక్స్, మ్యాక్స్, లైఫ్ స్టైల్, సెంట్రల్ వంటి ప్రముఖ రిటైల్ బ్రాండ్లు ఇప్పటికే విశాఖలో తమ కార్యకలాపాలు విస్తరించాయి. అద్దెల విషయానికొస్తే.. వీఐపీ రోడ్, వాల్తేర్ రోడ్, సంపత్ వినాయక్ రోడ్, సిరిపురంలలో చదరపు అడుగుకు రూ.200 నుంచి రూ.250 వరకు ఉంది. ద్వారకా నగర్, డాబా గార్డెన్, అచ్యుతాపురం, పర్వాడ తదితర ప్రాంతాల్లో రూ.100 నుంచి రూ.140 మధ్య ఉండగా.. గాజువాకలో రూ.100 నుంచి రూ.120 వరకు ఉంది. ఎంవీపీ కాలనీ, మురళీ నగర్ లలో రూ.80 నుంచి రూ.100 వరకు ఉంది.
This website uses cookies.