బాలీవుడ్ దర్శక నిర్మాత, అమీర్ ఖాన్ మాజీ భార్య కిరణ్ రావు ముంబై బాంద్రా వెస్ట్ లో ఓ లగ్జరీ అపార్ట్ మెంట్ అద్దెకు తీసుకున్నారు. నెలకు రూ.6.5 లక్షల అద్దె చెల్లించేలా ఒప్పందం కుదిరింది. ఐదేళ్ల కాలానికి అపార్ట్ మెంట్ అద్దెకు తీసుకోగా, సెక్యూరిటీ డిపాజిట్ గా రూ.30 లక్షలు చెల్లించారు. బాంద్రా వెస్ట్ లోని పాలి హిల్ లోని ఆనంద్ లో ఈ అపార్ట్ మెంట్ ఉంది. మొదటి ఏడాది నెలవారీ అద్దె రూ.6.5 లక్షలు కాగా, రెండో ఏడాది రూ.6.82 లక్షలు, మూడో ఏడాది రూ.7.16 లక్షలు, నాలుగో ఏడాది రూ.7.52 లక్షలు, ఐదవ సంవత్సరంలో రూ.7.90 లక్షలకు పెరుగుతుంది.
కాగా, ఇటీవల విడుదలైన బాలీవుడ్ బ్లాక్‌బస్టర్ స్ట్రీ 2 విజయంతో దూసుకుపోతున్న శ్రద్ధా కపూర్ ముంబైలోని జుహు ప్రాంతంలో నెలకు రూ.6 లక్షలకు అద్దెకు లగ్జరీ అపార్ట్ మెంట్ తీసుకున్నారు. ఆమె 3928.86 చదరపు అడుగుల అపార్ట్ మెంట్‌ను ఒక సంవత్సర కాలానికి అద్దెకు తీసుకున్నారు. ఇందుకోసం ఆమె రూ.72 లక్షల అడ్వాన్స్ అద్దె చెల్లించారు. అలాగే బాలీవుడ్ ఫిల్మ్ స్క్రీన్ రైటర్, దర్శకుడు, నిర్మాత కరణ్ జోహార్ కూడా ముంబైలోని పాలి హిల్ ప్రాంతంలో నెలకు రూ.8 లక్షల అద్దెకు మూడేళ్ల కాలానికి ఓ ఫ్లాట్ అద్దెకు తీసుకున్నారు. బాలీవుడ్ నటుడు ఇమ్రాన్ ఖాన్, ఆయన స్నేహితురాలు లేఖా వాషింగ్టన్ కూడా ముంబైలోని బాంద్రాలోని ఒక ఫ్లాట్‌ను సినీ నిర్మాత కరణ్ జోహార్ నుంచి రూ.9 లక్షల అద్దెకు మూడేళ్లపాటు లీజుకు తీసుకున్నారు.
