భూముల విలువ పెంపు నిర్ణయం వెనక్కి తీసుకోవాలి

ఏపీలో జూన్ ఒకటో తేదీ నుంచి అమలు చేస్తున్న భూముల మార్కెట్ విలువ పెంపు నిర్ణయాన్ని వెనక్కి తీసుకోవాలని ప్రభుత్వానికి నేషనల్ రియల్ ఎస్టేట్ డెవలప్ మెంట్ కౌన్సిల్ (నరెడ్కో) విజయవాడ చాప్టర్ విన్నవించింది. ఈ మేరకు సీఎం జగన్ మోహన్ రెడ్డికి నరెడ్కో విజయవాడ చాప్టర్ అధ్యక్షుడు బి.అమర్ నాథ్, ప్రధాన కార్యదర్శి జి. హరిప్రసాద్ విజ్ఞప్తి చేశారు. వారు విజయవాడలో విలేకరులతో మాట్లాడుతూ.. ప్రస్తుతం రియల్ ఎస్టేట్ రంగం చాలా ఇబ్బందులు ఎదుర్కొంటోందని, ఈ సమయంలో భూముల మార్కెట్ విలువ పెంచడం వల్ల లక్షలాది మంది రియల్టర్లు, బిల్డర్లు, సామాన్యులు మరింత ఇబ్బందులు పడాల్సి వస్తుందని ఆవేదన వ్యక్తంచేశారు. ఈ పరిస్థితిని అర్థం చేసుకుని ఆ నిర్ణయాన్ని విరమించుకుని రియల్ రంగాన్ని ఆదుకోవాలని కోరారు.