చెక్కు చెదరని విశ్వాసంతో కొందరు.. భయంతో మరికొందరు వాస్తును నమ్ముతారు. నిర్మాణాలు కట్టేవారిది మరో ధోరణి. వాస్తు నిబంధనల్ని పాటించకపోతే అమ్ముకోవడం కష్టమనేది వీరి భావన. ఏదైనప్పటికీ పాటించే వారిలో చాలామందికి వాస్తు సూత్రాల వెనక శాస్త్రీయమైన కారణాలు తెలియవు. వాస్తు నిపుణులమని చెప్పుకునేవారిలో ఎక్కువ మందికి అస్సలే తెలియదు. నేచురల్ ఎనర్జీ.. అదే సానుకూల శక్తి. ప్రసరించే దిశను బట్టి సానుకూల శక్తి, ప్రతికూల శక్తి అని రెండు రకాలుంటాయి. భారతీయ పరిస్థితుల్ని పరిగణనలోకి తీసుకుని ప్రకృతి శక్తులకు అనుగుణంగా ఇంటి నిర్మాణాన్ని సూచించేదే వాస్తు శాస్త్రం. మన దేశ పరిస్థితుల్ని బట్టి ఈశాన్య (నార్త్ ఈస్ట్) దిశ నుంచి గరిష్ఠ స్థాయిలో సానుకూల శక్తి ప్రసరిస్తుంది. ఈశాన్య దిశను మూసివేస్తే ఈ శక్తి మనకు దూరమవుతుంది. అందుకే, ఈశాన్య దిశను పూర్తిగా మూసివేయకూడదని వాస్తు చెబుతోంది.
ఆరోగ్యానికి ఆలంబన..
వాస్తు శాస్త్రం ముఖ్య లక్ష్యం.. ఆరోగ్యం. మెదడుపైనా, శరీరం పైనా సూర్మరశ్మి, భూ ఆయస్కాంత శక్తి చూపే ప్రభావం అంతాఇంతా కాదు. జీవితంలో ఎక్కువ కాలం ప్రతికూల శక్తి కింద జీవించే వారికి ఆరోగ్యం మృగ్యమే. రోజంతా ఎర్రటి ఎండలో తిరిగితే ఏమవుతుంది? ప్రధాన ప్రాకృతిక శక్తులు ఐదు (పంచ భూతాలు) అయినా వాస్తు నాలుగు అంశాలకు పెద్దపీట వేస్తుంది.
అమెరికా.. మన వాస్తు.. వేర్వేరు
వాస్తు శాస్త్రంలో సిరిసంపదల గురించి ప్రస్తావించింది. కొన్ని సూత్రాలు పాటిస్తే సంపద కలుగుతుందని సూచించింది. అందులో పరమార్థం ఏమీ లేదు. వాస్తు సూత్రాలు ఆరోగ్యానికి బాట వేస్తాయి. శరీరం ఆరోగ్యంగా ఉంటే మనస్సు ఎంతో ఆరోగ్యంతో విలసిల్లుతుంది. ఆరోగ్యవంతమైన మస్తిష్కం మరింత సమర్థంగా పని చేయగల్గుతుంది. అంతే, ఇంతకు మించి ఈ సూత్రాల్లో రహస్యం ఏమీ లేదు. లక్షల మంది భారతీయులు విదేశాల్లో నివసిస్తున్నారు. వీరికి వాస్తుపై నమ్మకం ఉండటంలో ఆశ్చర్యం ఏమీ లేదు. అయితే, ఇక్కడ ఒక ముఖ్యమైన విషయాన్ని గుర్తు పెట్టుకోవాలి. వాస్తు శాస్త్రం ఒక్కటే. అది సూచించే దిశలు ఒక్కటే. అయినప్పటికీ, అన్ని దేశాలకు ఒకేలా వర్తించదు. మన దేశంలో ఈశాన్య దిశ నుంచి సానుకూల శక్తి ప్రసరిస్తూ ఉంటే మరో దేశంలో ఇదే దిశ నుంచి ప్రతికూల శక్తి ప్రసరించే అవకాశముంది. ఆయా ప్రాంతాల అక్షాంశ, రేఖాంశాలు, సూర్యుడు, భూగమనం, పవనాల దిశ ఇవన్నీ పరిగణనలోకి తీసుకుని వాస్తుని అన్వయించుకోవాలి.
