కిషోర్ కుమార్ బంగ్లాలో విరాట్ రెస్టారెంట్..

• ముంబై జుహూలో వన్ 8 కమ్యూన్ ప్రారంభించిన కోహ్లీ

ప్రముఖ క్రికెటర్, టీమిండియా మాజీ సారథి విరాట్ కోహ్లీకి ఫుడ్ అండ్ బేవరేజెస్ వ్యాపారం కొత్తేమీ కాదు. కానీ ఆయన ఈ వ్యాపారాన్ని మరింత విస్తృతం చేసి ఓ సామ్రాజ్యాన్నే నిర్మించే పనిలో ఉన్నట్టు తెలుస్తోంది. ఇటీవల విరాట్ తన వన్8 కమ్యూన్ రెస్టారెంట్ కు చెందిన ఓ కొత్త బ్రాంచి ప్రారంభించారు. ఇందులో ఆకర్షణీయమైన అంశం ఏమిటంటే.. ముంబై జుహూలోని దివంగత కిషోర్ కుమార్ పాత బంగ్లాలో ఈ రెస్టారెంట్ ఏర్పాటు చేశారు. విరాట్ సెలబ్రిటీ కావడంతో ఆయన రెస్టారెంట్ కు వినియోగదారులు వెల్లువలా వస్తున్నారు. మరి విరాట్ రెస్టారెంట్ లో ఇంటీరియర్ ఎలా ఉంది? ఎలాంటి ఆకర్షణీయమైన డెకర్ ఉందో చూద్దామా?

లోపలకు అడుగు పెట్టిన తర్వాత ఔరా అని అనిపించక మానదు. అంత అందంగా దానిని తీర్చిదిద్దారు. విరాట్ 18వ నంబర్ పెద్ద జెర్సీ ఎంతో ఆకర్షణీయంగా కనిపిస్తుంది. ఔట్ డోర్, ఇన్ డోర్ థీమ్ లో పలు చోట్ల ఫుడ్ సర్వ్ చేసేలా చక్కగా ఏర్పాట్లు చేశారు. ఓ చోట పెద్ద గోడపై విరాట్ సంతకం అదిరిపోయేలా డిజైన్ చేశారు. ఈ రెస్టారెంట్ ను ఓ ప్రత్యేకమైన సందర్భంతో రూపొందించారు. ముంబై నగరం, పరిసరాలు, ప్రజలు ఇలా.. అన్నీ ప్రతిబింబించేలా ఉంటాయి. సరిగ్గా చెప్పాలంటే దివంగత కిషోర్ కుమార్ కు నివాళి అర్పించేలా ఉంటుంది. ప్రతి ఒక్కరూ కాస్త విశ్రాంతి తీసుకోవడానికి, హాయిగా సేద తీరడానికి మంచి స్థలం అనడంలో ఎలాంటి సందేహం లేదు. విరాట్ ఈ రెస్టారెంట్ ప్రారంభించడానికి ముందు చాలా కసరత్తే చేశారు. పలు చోట్ల పర్యటించి, లక్షలాది అంశాలు, లక్షలాది మంది ప్రజలను పరిశీలించి డిజైన్ విషయంలో తుది నిర్ణయానికి వచ్చారు. టేబుల్స్, కుర్జీలు, వాటిలో కుషన్లు.. ఇలా అన్నింటిపై ప్రత్యేక శ్రద్ధ కనబరిచారు. ఇంకా పచ్చని మొక్కలు, చెక్కతో కవర్ చేసిన గోడలతో ఇంటీరియర్ ను అద్భుతంగా తీర్చిదిద్దారు.