తెలంగాణ రాష్ట్రంలో ఇళ్లను కొనేవారికి ఒకేసారి గోడ దెబ్బ చెంప దెబ్బ తగిలింది. భూముల మార్కెట్ విలువల్ని పెంచే విషయంలో ఎవరూ తప్పు పట్టడం లేదు. కాకపోతే గత ఏడేళ్లుగా ఎందుకు పెంచలేదనే అంశాన్ని పలువురు నిపుణులు పలు రకాలుగా విశ్లేషిస్తున్నారు.
రెండు దెబ్బలు..
ఒకేసారి భూముల మార్కెట్ విలువ.. మరోవైపు స్టాంప్ డ్యూటీని పెంచడంతో ఇళ్ల కొనుగోలుదారులకు ఆర్థిక భారం పెరుగుతోంది. ఒక ఫ్లాట్ కొనేటప్పుడు యాభై వేలు తగ్గిందనో.. లక్ష రూపాయలు తక్కువగా ఉన్నాయనో.. సొంతింటి ఎంపికను వాయిదా వేసుకున్నవారు చాలామంది మనలో ఉన్నారు. యాభై వేలు తగ్గించమని చాలామంది తమను ప్రాధేయపడతారని కొందరు డెవలపర్లు చెబుతున్నారు. కాకపోతే, సరైన రేటు రాకపోతే తాము తగ్గించలేని పరిస్థితి అని అంటున్నారు. మరి, పరిస్థితి ఇలాగుంటే.. ఒకేసారి లక్ష రూపాయలు పెరిగితే సామాన్యులు, మధ్యతరగతి ప్రజానీకానికి ఎంతో భారంగా మారుతుందని నిపుణులు అభిప్రాయపడుతున్నారు.
