రామాయ‌ణ్ వ‌దిలి వెళ్ల‌ను

నటి సోనాక్షి సిన్హా ఇల్లు రామాయణ్ జుహులో పై అంతస్తు మొత్తం ప్రత్యేకంగా ఆమె కోసమే అలంకరించారు. క్లుప్తంగా చెప్పాలంటే ఇంట్లో ఇల్లు అన్నమాట. దీనిని అందంగా అలంకరించిన ఇంటీరియర్ డిజైనర్ రూపిన్ సుచక్ కు కూడా ఇది ఎంతో ప్రత్యేకమైనది. సోనాక్షి కోసం అలా అలంకరించడం తనకు ఎంతో ఇష్టమని రూపిన్ చెబుతారు. సోనాక్షి వ్యక్తిత్వానికి తగినట్టుగా కళాత్మక రంగులు, ఇతరత్రా వస్తువులు అలంకరణలో వినియోగించినట్టు వెల్లడించారు.

‘రామాయణ్ లోని ఈ అంతస్తు సోనాక్షి ఆమె ఇష్టాలను, నా సున్నితత్వాలను ఇంకా సౌందర్య భావాలను వెదజల్లుతుంది. ఇంట్లోనే సమయాన్ని గడపడానికి ఇష్టపడే వ్యక్తిగా, అందంగా అలంకరించిన ఈ ఇల్లు చక్కని వెలుతురుతో నిండి ఉంటుంది. నేను ఎప్పుడూ ఈ ఇంటిని వదిలి వెళ్లకూడదని కోరుకునేలా చేస్తుంది’ అని వివరించారు. లివింగ్ రూమ్ లో స్లైడింగ్ గ్లాస్ డోర్, ప్రకాశవంతమైన గులాబీ, పసుపు రంగు గ్లాస్ ప్యానెల్ తో డిజైన్ చేసి ఉంటుంది. లివింగ్ ఏరియాకు మరింత ఆకర్షణ తెచ్చేందుకు పాప్ ఆర్ట్, అబ్ స్ట్రాక్ట్ పెయింటింగ్స్ ఏర్పాటు చేశారు. నియాన్ లైట్, అందమైన కిటికీ, చక్కని బల్లలు రెట్రో లుక్ తీసుకొచ్చాయి. ఇక బెడ్ రూమ్ లో చదువుకోవడానికి వీలైన రీడింగ్ నూక్ ను ముదరు రంగుల ప్యాలెట్ తో అదిరిపోయేలా డిజైన్ చేశారు.