వాస్తును కాదని ఇల్లు కొన్నాం

– రియల్ ఎస్టేట్ గురుతో
ప్రముఖ టీవీ నటి మందిరా బేడీ

క్రికెట్ వ్యాఖ్యానంతో ఎంతో మంది అభిమానులను సంపాదించుకున్న ప్రముఖ టీవీ నటి మందిరా బేడీ గురించి ప్రత్యేక పరిచయం అవసరం లేదు. పురుషులకు మాత్రమే పరిమితమైన క్రికెట్ లో ప్రవేశించి.. తన వ్యాఖ్యానంతో ఆటకు గ్లామర్ తీసుకొచ్చారు. అటు క్రికెట్ వ్యాఖ్యాతగా.. ఇటు టీవీ నటిగా పేరు తెచ్చుకున్న ఆమె.. ఇంటీరియర్ లోనూ తనకు తానే సాటి అని నిరూపించుకున్నారు. ‘రామ’ అని పేరు పెట్టుకున్న తన ఇంటికి సంబంధించిన పలు అంశాలను ఆమె ముచ్చటించారు.

‘17 ఏళ్ల క్రితం నేను నా దివంగత భర్త ఇంటికి మారినప్పుడు అది ఓ చిన్న 2 బీహెచ్ కే అపార్ట్ మెంట్. కొంచెం ఇరుకైనది. అందుకే మేం ఎప్పుడైనా ఇంకా పెద్ద ఇంటికి వెళ్లాలనుకున్నాం. ఆ రోజు రానే వచ్చింది. ఓ మధ్యవర్తి ఈ ఇంటిని చూపించాడు. అప్పడు స్విమింగ్ పూల్ సగం మాత్రమే పూర్తయి ఉంది. నిజానికి ఈ స్థలం త్రిభుజాకారంలో ఉంది. వాస్తు ప్రకారం అది మంచిది కాదు. అయినప్పటికీ మేం ముందడుగు వేసి దీనిని కొనుగోలు చేశాం. డబ్బులు వచ్చినప్పుడల్లా దీనిని అప్ గ్రేడ్ చేశాం. దాదాపు ఏడాది పాటు పని నడిచింది’ అని ఆమె వెల్లడించారు.

మందిర తన ఇంటికి సహోద్యోగులను ఆహ్వానిస్తారు. అయినప్పటికీ తన వ్యక్తిగత అభిరుచులకు అనగుణంగానే ఇంటిని తీర్చిదిద్దారు. ఇంటీరియర్ ను స్వయంగా డిజైన్ చేసుకున్నారు. పాక్షింగా అలంకరించిన చిన్న ఇంటి నుంచి విలాసవంతమైన అపార్ట్ మెంట్ వరకు అన్నింటా మందిర తన ముద్ర కలిగి ఉన్నారు. ‘దీనికి చాలా చరిత్ర ఉంది. మేం ప్రారంభించినప్పుడు నేను ప్రతిదానిని సరిపోల్చడంపైనే నిమగ్నమయ్యాను. ఎంట్రీ గేట్ నుంచి లైట్ వరకు అన్నీ సరిపోల్చాను. ఇంకా నా చుట్టూ సినర్జీకి రంగులు కావాలి. వాటిని నా కుషన్ కవర్లపై అమలు చేశాను’ అని తెలిపారు.