ఆ 84 గ్రామాలను ఇలా చేయాలి..

తెలంగాణ డెవలపర్ల అసోసియేషన్ అధ్యక్షుడు జీవీ రావు

జీవో 111 కింద 84 గ్రామాల్లోని 1.32 లక్షల ఎకరాల భూముల అంశాన్ని సామాజిక ఆర్థిక అంశంగా చూడాలని తెలంగాణ డెవలపర్ల అసోసియేషన్ అధ్యక్షుడు జీవీ రావు పేర్కొన్నారు. ట్రిపుల్ వన్ జీవో ఎత్తివేతపై ఆయన రియల్ ఎస్టేట్ గురుతో మాట్లాడారు. ఆ 84 గ్రామాలను ఎలా తీర్చిదిద్దాలనే అంశంపై తన అభిప్రాయాలు పంచుకున్నారు.

‘తాము వెనకబడి ఉన్నామని, హైదరాబాద్ ఫలితాలు తమకు దక్కలేదన్నది ఆ 84 గ్రామాల ప్రజల వాదనను పరిగణనలోకి తీసుకుని ప్రభుత్వం జీవో 111 ఎత్తివేసింది. ఈ నేపథ్యంలో ఇది హైదరాబాద్ కు లాభమా లేక నష్టమా అనే అంశాలను పరిశీలించాలి. 84 గ్రామాలకు ఆర్థిక లబ్ధి, హైదరాబాద్ నగరానికి సామాజిక లబ్ధి చేకూరేలా చర్యలు తీసుకోవాలి. ముఖ్యంగా పర్యావరణ పరిరక్షణ అనేది ఇక్కడ చాలా కీలకం. ఇది చేయకుంటే హైదరాబాద్ కు నష్టం వస్తుంది. ఈ నేపథ్యంలో పర్యావరణ పరిరక్షణ అనుకూల మాస్టర్ ప్లాన్ రూపొందించాలి. వాన నీరు జలాశయాల్లోకి వెళ్లాలి? మురుగునీటిని ఎలా పంపించాలి? రవాణా పరిస్థితి ఏమిటి వంటి అంశాలను చూసుకోవాలి. ముఖ్యంగా చెట్లను కాపాడుకోవాలి.

84 గ్రామాల్లో ప్రధాన సమస్య సీవరేజీయే. ఇందుకోసం ఆధునిక సీవరేజి ట్రీట్ మెంట్ ప్లాంట్లు పెట్టాలి. ఇవన్నీ బాగా చేయడంతోపాటు ఆ 84 గ్రామాలను హెరిటేజ్ గ్రామాలుగా ప్రకటిస్తే.. వాటిని కాపాడుకునే అవకాశం ఉంటుంది. పర్యావరణ పరిరక్షణే ప్రధానంగా లేఔట్ చేయాలి. జలాశయాల బఫర్ జోన్ దాటిన తర్వాత కిలోమీటరు వరకు స్పోర్ట్స్ అరేనాను అభివృద్ధి చేయాలి. తర్వాత కిలోమీటరు ప్రాంతం అకడమిక్ ప్రాంతంగా ఏర్పాటు చేయాలి. మూడో కిలోమీటరు నుంచి 8 కిలోమీటర్ల వరకు రెసిడెన్షియల్ జోన్ చేయాలి. దీని తర్వాత కిలోమీటరు వరకు హోటళ్లు, రిసార్టుల వంటివి ప్లాన్ చేయాలి. హైదరాబాద్ నుంచి శంకర్ పల్లి, శంకర్ పల్లి నుంచి చేవెళ్ల, హైదరాబాద్ నుంచి శంషాబాద్ వంటి ప్రాంతాల్లో ఐటీని ప్రోత్సహించాలి. ఇలా చేస్తే బాగుంటుందనేది నా అభిప్రాయం. చండీగఢ్ తరహాలో ప్లాన్డ్ సిటీగా తీర్చిదిద్దే అవకాశాన్ని కూడా పరిశీలించి ఆ మేరకు ముందుకెళితే బాగుంటుంది’ అని తెలిపారు.